ԵՐԵՎԱՆ, 30 սեպտեմբերի - Sputnik. ՄԱԿ-ի Անվտանգության խորհուրդը մտահոգություն է հայտնել Լեռնային Ղարաբաղի հակամարտության գոտում լայնածավալ ռազմական գործողությունների մասին հաղորդումների կապակցությամբ: ՌԻԱ Նովոստիի փոխանցմամբ` այս մասին ասվում է այն նյութերում, որոնք հրապարակել Է ՄԱԿ-ի Անվտանգության խորհրդի նախագահ Աբդու Աբարին ԱԽ-ում քննարկման արդյունքների վերաբերյալ։
«Նրանք խստագույնս դատապարտել են ուժի կիրառումը և ափսոսանք հայտնել մարդկանց մահվան կապակցությամբ», - հայտարարել է Աբարին:
ՄԱԿ-ի Անվտանգության խորհուրդը կոչ է արել Հայաստանին և Ադրբեջանին անհապաղ դադարեցնել կրակը և առարկայական բանակցություններ սկսել առանց նախապայմանների, ինչպես նաև հաստատել է ԵԱՀԿ Մինսկի խմբի համանախագահների առանցքային դերն այս հարցում:
Աբարին լրագրողներին հայտնել է, որ ՄԱԿ-ի ԱԽ-ն կանի ամեն ինչ, որպեսզի լիցքաթափի իրավիճակը ԼՂ հակամարտության գոտում։
«Մենք կանենք այն ամենը, ինչ կարող ենք անել որպես Անվտանգության խորհրդի անդամներ ՝ իրավիճակը կարգավորելու համար։ Եթե պահանջվի, մենք կխոսենք երկու ներկայացուցիչների (Հայաստանի և Ադրբեջանի) հետ, որպեսզի օգնենք նրանց ընդհանուր լեզու գտնել այստեղ՝ Նյու Յորքում և իրադարձությունների վայրում»,-ասել է Աբարին ՝ պատասխանելով այն հարցին, թե արդյո՞ք Անվտանգության խորհուրդը չի պատրաստվում հանդիպումներ ունենալ ՄԱԿ-ում Հայաստանի և Ադրբեջանի մշտական ներկայացուցիչների հետ:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
ՀՀ պաշտպանության նախարարության ներկայացուցիչ Արծրուն Հովհաննիսյանը երեկ ճեպազրույցի ընթացքում հայտնեց, որ Ադրբեջանը ռազմական գործողությունների ընթացքում ընդհանուր առմամբ կորցրել է 790 կենդանի ուժ, որից 180–ը` Քարվաճառի ուղղությամբ, որտեղ համառ և թեժ մարտեր են ընթացել։ Նրա խոսքով` հակառակորդը մոտ 1900 վիրավոր ունի, կորցրել է 137 տանկ և զրահատեխնիկա, 72 ԱԹՍ, 7 ուղղաթիռ, 1 ինքնաթիռ։
Այսօր վաղ առավոտյան հայտնի դարձավ, որ հայկական կողմը ևս 2 ԱԹՍ է ոչնչացրել։
Կանանց ու երեխաներին տարհանել են Մարտակերտից, տղամարդիկ մնալու են մինչև հաղթական ավարտ
Վերջին տեղեկություններով` հակառակորդի կրակոցների հետևանքով զոհվել են 80 զինծառայողներ և 3 քաղաքացիական անձինք։ Հայկական կողմը շուրջ 200 վիրավոր ունի։
Մենք պատրաստ ենք ամեն ինչի. ՊԲ–ն հայ հրետանավորների մասնակցությամբ տեսանյութ է հրապարակել