ԵՐԵՎԱՆ, 28 սեպտեմբերի – Sputnik. ԱԺ պաշտպանության և ազգային անվտանգության հարցերի մշտական հանձնաժողովի նախագահ Անդրանիկ Քոչարյանն ԱԺ–ում, լրագրողների հետ զրույցում հայտնեց, որ այսօր առավոտյան հայկական ԶՈւ–ն հաջողություններ է արձանագրել Ասկերան–Մարտունի հատվածում։
«Հակառակորդը տվել է մարդկային կորուստներ, տվել է տեխնիկայի կորուստ։ Մենք հաջողություններ ենք արձանագրել նաև հարավային հատվածում` Ջաբրայիլի ուղղությամբ, որտեղ մենք, ինչպես նշեց Արցախի նախագահը, ունեցել էինք դիրքային կորուստներ»,– ասաց Քոչարյանը։
Պատգամավորը համոզմունք հայտնեց, որ պատերազմական գործողությունների ներկա վիճակում կարևորը ոչ թե դիրքային առավելություններն են, այլ բանակի մարդկային ներուժն ու հատկապես որակյալ ներուժը։
«Երբ հակառակորդը ռազմական գործողություններ էր ձեռնարկում, լավ չէր պատկերացնում, որ Հայաստանն ունի կերտած հաղթանակներ, որի հիշողությունը չի մարել։ Իրենք մեզ ստիպեցին բանակի կարողությունների ավելացման տեմպը ուժեղացնել»,– ասաց Քոչարյանը։
Նրա խոսքով` Հայաստանի իշխանությունը սեպտեմբերի 27-ին ճիշտ որոշում կայացրեց` համազգային մոբիլիզացիա հայտարարելով։
«Երեկ իրականություն դարձավ որակյալ մոբիլիզացիան։ Զինկոմիսարիատներ էին դիմում ու գալիս էին ցուցակներով արդեն բանակային որոշակի մասնագիտություններ ստացած, տարիներ շարունակ Արցախում զինվորական ծառայություն անցած մասնագետներ, որոնք ոչ միայն ծանոթ են Արցախի առաջնագծին, այլև ծանոթ են առաջնագծի այսօրվա հրամանատարությանը` անկախ իրենց ներկայիս զբաղեցրած դիրքից, ինչը ևս շատ կարևոր է»,– ասաց նա։
Քոչարյանը նշեց, որ սեպտեմբերի 27-ին շատ արագ ձևավորված մարտական ռեզերվն այսօր արդեն Արցախում է ու գտնվում է ՊԲ հրամանատարության ներքո։
Քոչարյանի դիտարկմամբ` հայկական զինուժն այս կերպ չունեցավ մարդկային ուժի խզում, ինչը հատկապես կարևոր է տևական մարտական գործողությունների ժամանակ։
Հայկական ԶՈւ-ն վերականգնել է նախկինում կորցրած մի շարք դիրքեր. տեսանյութ 18+
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով:
Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 27 անօդաչու թռչող սարք, 33 տանկ և ՀՄՄ, 2 ինժեներական զրահատեխնիկա։ Մարտերը շարունակվում են։
Հրետանու կիրառության խտությունն աննախադեպ է. մեր հրետանավորները փայլում են
Հակառակորդի կրակոցների հետևանքով զոհվել են 58 զինծառայողներ և 2 քաղաքացիական անձինք։ Հայկական կողմը շուրջ 200 վիրավոր ունի։ Հակառակորդի կորուստներն անհամեմատ մեծ են։ Արցախում և Հայաստանում ռազմական դրություն և համատարած զորահավաք է հայտարարվել։