ԵՐԵՎԱՆ, 28 սեպտեմբերի – Sputnik. Այսօր Հայ առաքելական եկեղեցու ռուսաստանյան և նորնախիջևանյան թեմի, Ռուսաստանի հայերի միության և հայկական համայնքային այլ կազմակերպությունների, նախաձեռնող խմբերի, երիտասարդական կառույցների և գործարար համայնքի ներկայացուցիչների մասնակցությամբ հանդիպում է տեղի ունեցել Արցախում ստեղծված իրավիճակի կապակցությամբ: Տեղեկությունը հայտնում է ՌԴ-ում ՀՀ դեսպանությունը։
Դեսպան Վարդան Տողանյանը, ներկայացնելով հանրապետությունում տիրող իրավիճակը և միջազգային մակարդակով կատարված աշխատանքները, կարևորել է Ռուսաստանի հայերի ջանքերի և ներուժի միավորումը, գործունեության առանցքային ուղղություններով գործողությունների համակարգումը:
Հանդիպմանը ելույթ է ունեցել նաև ՌՀՄ նախագահ Արա Աբրահամյանը:
Հանդիպման ընթացքում լուծվել են աշխատանքների կազմակերպման և իրականացման, այդ թվում՝ Արցախի բնակչությանն անհրաժեշտ օգնություն ցուցաբերելու հարցերը:
Ամենօրյա ձևաչափով համակարգման աշխատանքները կշարունակվեն դիվանագիտական ներկայացուցչությունում:
Հիշեցնենք, որ սեպտեմբերի 27–ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով: Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 27 անօդաչու թռչող սարք, 33 տանկ և ՀՄՄ, 2 ինժեներական զրահատեխնիկա։
Առաջնագծում թշնամին ոչ մի հաջողություն չունի. Վահրամ Պողոսյան
Հակառակորդի կրակոցների հետևանքով քաղաքացիական բնակչությունից Մարտունիում մեկ կին և մեկ երեխա են զոհվել, զոհվել են նաև 31 զինծառայող։ Հայկական կողմը 200 վիրավոր ունի։ Հակառակորդի կորուստներն անհամեմատ մեծ են։ Արցախում և Հայաստանում ռազմական դրություն և համատարած զորահավաք է հայտարարվել։
Թուրքիան հավաքագրում է օտարազգի ահաբեկիչ զինյալների և տեղափոխում Ադրբեջան. ՀՀ ԱԳՆ