ԵՐԵՎԱՆ, 27 սեպտեմբերի - Sputnik. ՀՀ Սյունիքի մարզի սահմանամերձ բնակավայրերում ու մարտական դիրքերում իրավիճակը վերահսկելի է ու կայուն։ Այս մասին Facebook-ի իր էջում գրել է ՀՀ Սյունիքի մարզպետ Հունան Պողոսյանը։
«ՀՀ զինված ուժերը կատարում են իրենց գործառույթները՝ անառիկ պահելով մեր սահմանները։ Իսկ Սյունիքի մարզային իշխանություններն իրականացնում են իրավիճակից բխող բոլոր անհրաժեշտ գործողությունները»,-գրել է Պողոսյանը։
Նա հորդորել է մարզի բնակիչներին պահպանել հանգստություն ու հետևել միայն պաշտոնական լրահոսին։
ՀՀ Սյունիքի փոխմարզպետ Նարեկ Բաբայանն էլ հայտարարել է, որ Սիսիանի բժշկական կենտրոնը արյան կամավոր դոնորների հրատապ կարիք ունի։
Ցանկացողները կարող են զանգահարել 094663811 հեռախոսահամարով։
Ադրբեջանը կարող է հարձակվել նաև Հայաստանի վրա. Փաշինյանի կոչը միջազգային հանրությանը
Հիշեցնենք, որ այսօր վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով:
Արցախի պաշտպանության նախարարությունը տեղեկացրել էր, որ ճշտված տեղեկություններով` ադրբեջանական զինուժը կորցրել է 2 ուղղաթիռ, 14 անօդաչու թռչող սարք, ինչպես նաև ունի զրահատեխնիկայի կորուստներ:
Հայտնի է, որ հակառակորդի կրակոցների հետևանքով Մարտունիում մեկ կին և մեկ երեխա են զոհվել։
Արցախում և Հայաստանում ռազմական դրություն և համատարած զորահավաք է հայտարարվել։