ԵՐԵՎԱՆ, 27 սեպտեմբերի - Sputnik. ԱՄՆ կոնգրեսական Ադամ Շիֆն ԱՄՆ հատուկ ծառայություններին կոչ է անում պարզել՝ ով է արցախա–ադրբեջանական ռազմական բախումների նախաձեռնողը՝ Ադրբեջանին պատասխանատվության ենթարկելու համար:
«Ադրբեջանն այս գիշեր լայնածավալ հարձակում է իրականացրել Արցախի դեմ, և, նախնական տեղեկությունների համաձայն, զգալի կորուստներ են ունեցել: Միացյալ Նահանգները պետք է անհապաղ աշխատանքներ իրականացնի ԵԱՀԿ Մինսկի խմբի անդամների հետ խաղաղությունը վերականգնելու համար` կանխելով հետագա լարվածությունը, որը կարող է ավելի շատ կյանքեր վտանգել»,- Facebook սոցցանցի իր էջում գրել է Շիֆը։
Իրանը պատրաստ է միջնորդ լինել Ղարաբաղի հարցով բանակցություններում. Զարիֆ
Նա նշել է, որ այժմյան հարձակումը տեղի է ունեցել հայ-ադրբեջանական սահմանին հուլիսյան ռազմական բախումներից ամիսներ անց:
Շիֆի խոսքով` Ադրբեջանի ագրեսիան ի ցույց է դնում կեղծ համարժեքության քաղաքականության տապալումը, որը ոչ այլ ինչ է, քան Ադրբեջանի ռազմատենչ հռետորաբանության հակառակ կողմը։
Հիշեցնենք, որ սեպտեմբերի 27–ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով:
Ըստ վերջին տեղեկությունների` ադրբեջանական զինուժը կորցրել է 3 ուղղաթիռ, 21 անօդաչու թռչող սարք, 30 տանկ։
Հայտնի է, որ հակառակորդի կրակոցների հետևանքով քաղաքացիական բնակչությունից Մարտունիում մեկ կին և մեկ երեխա են զոհվել։ Զոհվել են նաև 16 զինծառայողներ։ Հայկական կողմը 100–ից ավելի վիրավոր ունի։
Արցախում և Հայաստանում ռազմական դրություն և համատարած զորահավաք է հայտարարվել։