ԵՐԵՎԱՆ, 26 սեպտեմբերի – Sputnik. ՀՀ ոստիկանությունն ավելի քան 145 հազար վարչական տույժ նշանակելու որոշում է կայացրել երկրում հայտարարված արտակարգ դրությունից հետո։ Տեղեկությունը հայտնեցին ՀՀ ոստիկանության հասարակայնության հետ կապի և լրատվության վարչությունից` ի պատասխան Sputnik Արմենիայի հարցմանը։
ՀՀ–ում արտակարգ դրության հայտարարելուց առ այսօր 138 732 վարչական տույժ նշանակելու որոշում է կայացվել ազատ տեղաշարժվելու պայմանները խախտելու համար, իսկ Հայաստանի Հանրապետությունում կարանտին հայտարարելուց հետո անհատական պաշտպանության միջոցների կիրառման կանոնները խախտելու համար` 5441 որոշում։
Հիշեցնենք` մարտի 16–ից Հայաստանում արտակարգ դրություն էր սահմանված, որը մի քանի անգամ երկարաձգվեց և տևեց մինչև սեպտեմբերի 11–ը։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Մայիսի 18–ից Հայաստանում աշխատում է նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով լինեն։
Հանրային բաց տարածքներում դիմակ դնելը նույնպես պարտադիր է։ Դիմակ կարող են չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները (վերջինները պետք է իրենց մոտ ունենան համապատասխան հիվանդության փաստը հաստատող բժշկական փաստաթուղթ)։
Սեպտեմբերի 11–ին ՀՀ կառավարությունը որոշեց, որ Հայաստանում սեպտեմբերի 12–ից մինչև 2021թ.–ի հունվարի 11–ը կգործի կարանտինի ռեժիմ։ Կարանտինի ընթացքում որոշ սահմանափակումներ մեղմացվել են, բայց հասարակական վայրերում դիմակ դնելու պահանջը շարունակում է գործել: