ԵՐԵՎԱՆ, 23 սեպտեմբերի – Sputnik.Հայաստանի պետական տնտեսագիտական համալսարանը (ՀՊՏՀ) ժամանակավորապես դադարեցնում է ուսումնական գործընթացը։ Տեղեկությունը հրապարակվել է բուհի կայքում։
«Կոլեկտիվի գերակշիռ մեծամասնության որոշմամբ բուհը ժամանակավորապես դադարեցնում է ուսումնական գործընթացը՝ մինչև ս.թ. հուլիսի 17-ին կայացած մրցույթում «ՀՊՏՀ» ՊՈԱԿ խորհրդի անդամների կողմից ձայների մեծամասնությամբ ընտրված ռեկտորի՝ օրենքով սահմանված կարգով նշանակումը»,– նշված է ռեկտորատի և ուսանողական խորհրդի հայտարարության մեջ։
ՀՊՏՀ-ից նշում են նաև, որ այս պարտադրված քայլը բխում է նաև ուսանողների շահերից, քանի որ կրթության որակը ենթադրում է կայունություն երկարաժամկետ կտրվածքով։ Բուհը հանձն է առնում լրացնել բաց թողնված բոլոր դասաժամերը։
Միևնույն ժամանակ ռեկտորատը վաղը՝ սեպտեմբերի 24-ին, ժամը 10։00-ին, հրավիրում է ՀՊՏՀ բակ՝ սույն հարցի առնչությամբ բաց քննարկման։
Հուլիսի 17-ին կայացած մրցույթում «ՀՊՏՀ» ՊՈԱԿ խորհրդի անդամների ձայների 2/3-ով ռեկտորի պաշտոնում ընտրվել է Դիանա Գալոյանը: Հենց նույն օրը ՀՀ կրթության, գիտության, մշակույթի և սպորտի նախարարության Բարձրագույն որակավորման հանձնաժողովն անվավեր ճանաչեց Տնտեսագիտական համալսարանի նախկին ռեկտոր Դիանա Գալոյանի՝ տնտեսագիտության դոկտորի գիտական աստիճանը:
Այս որոշումը ԿԳՄՍՆ–ն չեղյալ համարեց, քանի որ քննություն էր իրականացրել ու պարզել, որ Բարձրագույն որակավորման կոմիտեն անհիմն որոշում է կայացրել:
«Բարձրագույն և հետբուհական մասնագիտական կրթության մասին» ՀՀ օրենքի 15-րդ հոդվածի 4-րդ կետի համաձայն՝ ՀՀ կառավարությունը պետք է հաստատի ռեկտորի ընտրության արդյունքները, ինչն ընտրությունից ավելի քանի երկու ամիս անց դեռևս չի իրականացվել։ Համալսարանի դասախոսներն ու ուսանողները երեկ բողոքի ակցիա էին անցկացնում կառավարության դիմաց։