ԵՐԵՎԱՆ, 22 սեպտեմբերի — Sputnik. ՀՀԿ փոխնախագահ Արմեն Աշոտյանն այսօր լրագրողների հետ զրույցում հայտարարեց, որ ընդդիմությունը միավորվելու է, բայց դա չի լինելու արհեստական միավորում։
«Այդ միավորումը լինելու է բնական գործընթաց, որի հիմքում ընկած է լինելու ոչ միայն մեր կողմից առաջ քաշած «Հայաստանն առանց Նիկոլի» կարգախոսը, այլև լինելու է երկրորդ կարգախոսը. «Հայաստանը Նիկոլից հետո»:
Նրա խոսքով` իշխանություն վերցնելը մի «այիբ» է, իշխանությունից զրկվել` երկու։
«Նիկոլ Փաշինյանի օրինակով մենք տեսնում ենք, որ նա իշխանությունը վերցրեց, բայց այդ մեքենան վարել չի կարողանում։ Նիկոլի դեպքում կառավարելը 2–րդ «այիբն է»»,-վստահ է ՀՀԿ փոխնախագահը։
Որպես իր խոսքերի ապացույց նա մատնանշեց երեկ` Անկախության օրը ՀՀ վարչապետի ներկայացրած մինչև 2050թ.–ի տեսլականը, որին ըստ նրա, «ոչ ոք չհավատաց, և որը ծիծաղի առարկա դարձավ։
Անդրադառնալով մինչև 2050 թվականի ռազմավարությանը` Աշոտյանն ասաց, որ Փաշինյանի ոչ մի խոստում կյանքի չի կոչվել առ այսօր։ «Եթե նա կարճաժամկետ նպատակներ չի կարողանում կյանքի կոչել, ինչպե՞ս է կյանքի կոչելու երկարաժամկետները։ Մեգաստախոսը խոսում էր մեգա նպատակների մասին: Նիկոլ Փաշինյանը հանրային ընկալման մեջ այն մարդը չէ, որ ստեղծել է տպավորություն, թե ունի բավարար գիտելիքներ, որ կարողանա տալ երկրի տեսլական, որևէ մեկը այդ թեզերը լուրջ ընդունել չի կարող»,–կարծում է Աշոտյանը։
Նրա խոսքով` տեսլականը բանաձևելու համար պետք է ունենալ գիտելիքների պաշար։ Երկրին իհարկե պետք է տեսլական, ու Աշոտյանն ընդգծում է, որ Փաշինյանը կարող է մասնակցել դրա ստեղծմանը, բայց տեսլականի «դիրիժորն ու կնքահայրը չի կարող լինել»։
«Գործընթացը բացառապես քաղաքական է, ՔԿ-ՀՔԾ պինգ-պոնգը վկա». Աշոտյանին կրկին հարցաքննել են
Անդրադառնալով ԲՀԿ, ՀՅԴ ու «Հայրենիքը» կուսակցությունների համատեղ հանրահավաքին` Աշոտյանն ասաց, որ առանց ՀՀԿ-ի գործուն մասնակցության դժվար է լինելու Հայաստանում պատկերացնել լրջագույն քաղաքական պրոցես, որը կբերի իշխանափոխության: «Եթե որևէ ուժի մոտ դա կստացվի, ես ոտքի կարող եմ ոտքի կանգնել ու ծափահարել»:
Հիշեցնենք, որ Հայաստանի Հանրապետության անկախության 29–րդ տարեդարձին ՀՀ վարչապետ Նիկոլ Փաշինյանը ներկայացրել է ՀՀ մինչև 2050 թ.–ի ռազմավարությունը, որտեղ մատնանշվել է, թե ինչ նշաձող է սահմանված բոլոր ոլորտներում մինչև այդ թվականը հասնելու համար։