ԵՐԵՎԱՆ, 18 սեպտեմբերի — Sputnik. ՀՀ Բարձրագույն դատական խորհուրդն ընդունել է Երվանդ Խունդկարյանի հրաժարականի դիմումը և նրան ազատել ՀՀ վերաքննիչ դատարանի նախագահի պաշտոնից։ Տեղեկությունն ԱԺ նիստում հայտնեց ՀՀ ԱԺ նախագահ Արարատ Միրզոյանը։
Այդ հայտարարությունից հետո նա ընդմիջեց օրակարգային հարցի քննարկումն ու ամբիոնի մոտ հրավիրեց ՍԴ դատավորի թափուր պաշտոնում ընտրված Երվանդ Խունդկարյանին` ՍԴ դատավորի երդման արարողության համար։
«Հավաստիացնում եմ, որ ոչ թե խոսքով, այլ գործով ամեն ինչ պետք է անեմ ՍԴ իմ գործընկերների հետ միասին է՛լ ավելի ամրապնդելու սահմանադրական արժեքները ՀՀ–ում»,– մինչ երդման տեքստն արտասանելն ասաց Խունդկարյանը։
Երդման արարողությունից հետո ԱԺ–ն ծափերով շնորհավորեց ՍԴ նորընտիր անդամին ու շարունակեց ընդհատված նիստը։
Հիշեցնենք` Խունդկարյանի թեկնածությունը ՍԴ դատավորի թափուր տեղի համար առաջադրել էր ՀՀ Դատավորների ընդհանուր ժողովը։
ՍԴ դատավորների մյուս երկու թափուր տեղերում ԱԺ–ն ընտրել էր ՀՀ կառավարության առաջադրած թեկնածու Էդգար Շաթիրյանին ու ՀՀ նախագահի առաջադրած Արթուր Վաղարշյանին։
ՍԴ նորընտիր դատավորներից 2–ը երդում տվեցին. 3–րդը նիստին չէր մասնակցում
Երեկ` սեպտեմբերի 17-ին ՍԴ նորընտիր դատավորները խորհրդարանում կայացած նիստի ժամանակ երդում էին տվել` ստանձնելով իրենց նոր պարտականությունները։
Երվանդ Խունդկարյանի երդման արարողությունը հետաձգվել էր` պայմանավորված այն հանգամանքով, որ նա դեռ չէր ազատվել նախկին պաշտոնից։
Խունդկարյանն իր հրաժարականի դիմումի մասին հայտարարել էր այսօր առավոտյան։