ԵՐԵՎԱՆ, 18 սեպտեմբերի - Sputnik. ՀՀ երկրորդ նախագահ Ռոբերտ Քոչարյանն այսօր քաղաքագետների հետ քննարկման շրջանակում անդրադարձել է 2002թ–ին Քի Վեսթում տապալված բանակցային գործընթացին ու պատմել, թե ինչու Հեյդար Ալիևը վերջին պահին հրաժարվեց ստորագրել բանակցային փաստաթուղթը։
«Ճաշի ժամանակ իրար կողք էինք նստած ու Հեյդար Ալիևն ինձ բացատրեց, թե ինչու հրաժարվեց փաստաթուղթն ստորագրել։ Ինքը չէր սպասում Ադրբեջանում նման արձագանքի։ Այն ժամանակ հրաժարականներ տվեցին Վաֆա Գուլուզադեն (նախագահի խորհրդական), Թոֆիկ Զուլֆուգարովը (ԱԳ նախարար), իր աշխատակազմից մի շարք մարդիկ։ Նա ասաց, որ կարծում էր՝ իր հեղինակությունը թույլ կտա այդ բարդ որոշումը կայացնել և կյանքի կոչել։ Հեյդար Ալիևը նշեց, որ կարծես՝ թերագնահատել է հարցի կարևորությունն իր ժողովրդի համար ու գերագնահատել է իր ազդեցության աստիճանը։ Ուղղակի ինքը շատ ազնիվ ձևով ինձ դա խոստովանեց»,– ասաց Քոչարյանը։
Նախապայման դնում է Ադրբեջանը. Փաշինյանն արձագանքել է համանախագահների առաջարկին
Հիշեցնենք` 2002թ. Քի Վեսթում Քոչարյան-Հեյդար Ալիև մեկշաբաթյա գագաթնաժողովի ավարտին նախատեսված էր բանակցային փաստաթղթերի ստորագրում, որոնք մեկնաբանվում էին որպես ղարաբաղյան հարցի ամբողջական լուծում: Փաստաթուղթը ներառում էր անվտանգության երաշխիքներ, փախստականներին վերաբերող կարգավորումներ։ Իսկ կարևոր սկզբունքն այն էր, որ ԼՂ-ը` Լաչինի հետ միասին Հայաստանի ինքնիշխանությանը հանձնելու դիմաց Ադրբեջանին Հայաստանի տարածքով դեպի Նախիջևան կայուն և անխափան միջանցք էր տրամադրվելու։ Այս սկզբունքները հետագայում ստացան «Փարիզյան սկզբունքներ» անվանումը, քանի որ դրանք մշակվել էին Ֆրանսիայի նախագահ Ժակ Շիրակի անձնական ու անմիջական միջնորդությամբ։
Ադրբեջանական կողմի սահմանային դիրքերի ամրապնդմանը հաջորդելու են նոր սադրանքներ. Մինասյան
Բայց Քի Վեսթում իր համաձայնությունը տալուց հետո՝ վերադառնալով Բաքու, նախագահ Ալիևը հետ կանգնեց դրանց ստորագրումից։ Արդյունքում` Քի Վեսթի համաձայնագիրը մերժվեց Ադրբեջանի կողմից: