ԵՐԵՎԱՆ, 16 սեպտեմբերի - Sputnik. Կրթության, մշակույթի, սպորտի, գիտության ոլորտներում «ձախողումների շքերթ է»։ ԱԺ-ի մոտ ԿԳՄՍ նախարար Արայիկ Հարությունյանի հրաժարականի պահանջով ակցիայի ժամանակ հայտարարեց Երևանի ավագանու «Լույս» խմբակցության ղեկավար Դավիթ Խաժակյանը։
Նշենք, որ պայմանավորված այն իրավիճակով, որ տիրում է Հարությունյանի համակարգած ոլորտներում, «Լուսավոր Հայաստան» խմբակցության նախաձեռնությամբ Ազգային ժողովում իրականացվելու է քվեարկություն՝ Արայիկ Հարությունյանի հրաժարականի պահանջով։
«Այն, ինչ մարդիկ պատկերացնում էին, ակնկալում էին, որ հեղափոխությունը պետք է բերեր, դա չի իրականացել։ Կրթության ոլորտում հեղափոխություն, բարեփոխումներ չկան, դրա համար էլ մենք անհրաժեշտ ենք գտել ներկայացնելու այդ պահանջը»,- ասաց Խաժակյանը՝ նշելով, արդեն երկար ժամանակ է՝ Արայիկ Հարությունյանի վարած քաղաքականությունից դժգոհություններ ունեն և՛ ընդդիմության, և՛ իշխանության տարբեր ներկայացուցիչներ, ոլորտին առնչվող մարդիկ։
ՀՅԴ-ի դեմ քրգործերն արկղերով նրանց ուղարկելը մի քանի ժամվա հարց է. Արայիկ Հարությունյան
Ինչ վերաբերում է, թե ինչպես Ազգային ժողովում կքվեարկի մեծամասնությունը, Խաժակյանը նշեց՝ հույս ունի, որ «Իմ քայլը» չի առաջնորդվի «Лицо приближенное к императору» տրամաբանությամբ։ Նա վստահ է՝ եթե Արայիկ Հարությունյանը լիներ ոչ կուսակցական կամ «ոչ հեղափոխական առաջնորդ», ինչպես ինքն է իր մասին ասում, ապա արդեն մի քանի հրաժարական ներկայացրած կլիներ։