ԵՐԵՎԱՆ, 16 սեպտեմբերի - Sputnik, Արմենուհի Մխոյան. Մինչ 1988 թվականի ավերիչ երկրաշարժը Գյումրիում «Բարեկամության այգին» սիրված վայր էր բնակիչների համար։ Երկրաշարժից հետո այն վերածվեց տնակային ավանի, որտեղ «հանգրվանեցին» ժամանակավոր կացարանները: Շուրջ երեք տասնամյակ անց տնակատերերը տուն ստացան, տնակները քանդվեցին, իսկ տարածքը շուտով կբարեկարգվի:
Վերականգնված այգին գյումրեցիների և քաղաքի հյուրերի համար կդառնա ոչ միայն հետաքրքիր ժամանցային գոտի, այլև բարեկամության և երախտագիտության խորհրդանիշ՝ բոլոր այն երկրների համար, որոնք 1988 թ.-ի ավերիչ երկրաշարժից հետո օգնության ձեռք մեկնեցին քաղաքին:
«Հայաստանի զարգացման նախաձեռնություններ» (IDeA) հիմնադրամը հուլիսին նախաձեռնեց Գյումրու Բարեկամության այգու ռեկրեացիոն ենթակառուցվածքի տարրերի ճարտարապետական լուծումների մշակման միջազգային բաց մրցույթը: Մրցույթի առաջին փուլի արդյունքներով՝ ժյուրիի անդամներն ընտրել են 20 մասնակցի, որոնք կմասնակցեն մրցույթի եզրափակիչ փուլին:
«Մասնակցությունն աննախադեպ էր՝ ստացվել էր 84 հայտ 16 երկրից: Երկրորդ փուլի արդյունքում կընտրվեն 3 ճարտարապետական՝ փոքր, ստանդարտ և յուրօրինակ տարրեր: Այգու նախագծի մշակման գործընթացն անիմաստ կլինի առանց տեղի բնակչության ներգրավվածության»,- Sputnik Արմենիայի հետ զրույցում ասաց այգու համալիր զարգացման նախագծի ղեկավար, ճարտարապետ Մարգարիտա Ասիրյանը:
2020 թվականի հոկտեմբերին կհայտարարվեն հաղթողներն ու այգու վերջնական դիզայնի նախագիծը:
«Նորացված այգին կդառնա հանրապետության առաջին ժամանակակից և կանաչապատ տարածքը՝ մնալով նշանակալի վայր տեղի բնակիչների և գրավչության կենտրոն զբոսաշրջիկների համար։ Սա նաև մի վայր է լինելու, որտեղ գյումրեցիներն իրենց շնորհակալություն են հայտնելու երկրաշարժի օրերին ձեռք մեկնած երկրներին, իսկ ամենակարևորը՝ լինելու է համայնքային սիրված վայր»,- նշեց հիմնադրամի՝ Գյումրու զարգացման ծրագրի ղեկավար Ելենա Մուրադյանը։
Նա շտապես ևս մեկ գաղտնիք բացահայտել․ դեռ մեկուկես տարի առաջ Գյումրի տեղափոխված իտալական կարուսել-ատրակցիոնները տեղ կգտնեն հենց այս այգում:
«Դրանք ամենասիրվածն են լինելու: Հպարտությամբ կարող եմ ասել, որ նմանատիպ կարուսելներ շատ քաղաքներ չունեն: Ունենք գաղափար համալրելու այդ տասը կարուսելը ևս մի քանիսով: Հուսով ենք՝ այգին վերջնական տեսքով կունենանք 2022 թվականի ամռան վերջին»,-հավելեց Մուրադյանը:
Կարուսելներ, հետաքրքիր խաղային ատրակցիոններ ու խաղահրապարակ. ծրագրի պատասխանատուները խոստանում են նաև գյումրեցի փոքրիկների առաջարկները չանտեսել։ Նրանցից 11-ամյա Ջուլյան ընկերների հետ արդեն ներկայացրել է այգու վերաբերյալ իր պատկերացումները, մյուսները պետք է շտապեն, եթե ուզում են, որ իրենց գաղափարներն էլ ներառվեն ինքնատիպ նախագծի վերջնական տարբերակում։