ԵՐԵՎԱՆ, 16 սեպտեմբերի - Sputnik. ԱԺ–ն այսօր՝ սեպտեմբերի 16-ին, 110 կողմ, 5 դեմ ու 0 ձեռնպահ ձայներով հաստատեց Կորոնավիրուսի դեմ պայքարի արդյունավետությունը քննող հանձնաժողովի կազմը հաստատելու մասին որոշումը։
Այսպիսով` նորաստեղծ հանձնաժողովը բաղկացած կլինի 12 անդամներից, որոնցից 7-ը՝ «Իմ քայլից», 3-ը` ԲՀԿ-ից, 2-ը` ԼՀԿ-ից։
Հիշեցնենք, որ նոր քննիչ հանձնաժողովն արդեն ստեղծված էր` օրենքի ուժով, այն պահից, երբ ընդդիմադիր «Լուսավոր Հայաստան» խմբակցությունը հանդես էր եկել նման առաջարկով։
Հանձնաժողովի գործունեությունը սկսելու համար խորհրդարանին մնում էր հաստատել միայն նորաստեղծ մարմնի կազմը` դրանով թույլ տալով հանձնաժողովին իրապես գործել։
Մինչ որոշման ընդունումը «Իմ քայլը» խմբակցության ղեկավար Լիլիթ Մակունցը հայտարարեց, որ իշխող խմբակցութոյունը որոշել է չխոչընդոտել հանձնաժողովի ստեղծմանը, կառաջադրի հանձնաժողովի անդամներ, թեև չի կարծում, որ հանձնաժողովի աշխատանքն այս փուլում արդյունավետ կլինի։
«Ոչ միայն Հայաստանում, այլև ամբողջ աշխարհում համավարակը հաղթահարված չէ, և շատ գիտնականներ, բժիշկներ փորձում են պարզել կորոնավիրուսի իրական ծագումնաբանությունը` առավել արդյունավետ կանխարգելիչ միջոցներ գտնելու համար: Եվ, հետևաբար, մենք մնում ենք այն կարծիքին, որ նման քննիչ հանձնաժողով ստեղծելն այս պահին առնվազն անհասկանալի է, որովհետև այն որևէ էական, շոշափելի արդյունք չի տալու»,– ասաց Մակունցը։
Ինչ է պետք անել կորոնավիրուսի դեմն առնելու համար. վարակաբանության պրոֆեսորի կարծիքը
Քվեարկությունից ու որոշումն ընդունելուց հետո «Լուսավոր Հայաստանի» ղեկավար Էդմոն Մարուքյանը հայտարարեց, որ համացանցը ողողված է տեսանյութերով, որտեղ ոստիկանները քաղաքացիներին, այդ թվում՝ կանանց բռնի ուժով, լացակումած բերման են ենթարկում դիմակ չդնելու համար։
«Ես նախ դատապարտում եմ այդ ոչ իրավաչափ քայլը»,–նշեց Մարուքյանը` կոչ անելով խորհրդարանին ոստիկանությունից պահանջել ծառայողական քննություն անցկացնել նման դեպքերի վերաբերյալ։
Ընդդիմադիր խմբակցության ղեկավարը հիշեցրեց, որ դիմակ չդնելու համար ոստիկաններն իրավունք ունեն տուգանել քաղաքացիներին, բայց ոչ ուժ գործադրել։