ԵՐԵՎԱՆ, 14 սեպտեմբերի – Sputnik․ ԱՄՆ նախագահ Դոնալդ Թրամփը վստահ է, որ ԱՄՆ նախորդ նախագահ Բարաք Օբաման արժանի չէր խաղաղության Նոբելյան մրցանակին։ Այդ մասին Սպիտակ տան ղեկավարը հայտնել է Նևադա նահանգում տեղի ունեցած հանրահավաքի ժամանակ, տեղեկացնում է ՌԻԱ Նովոստին։
«Հիշում եք մեր մեծն նախագահին, չէ՞։ Բարաք Հուսեին Օբաման, նա մրցանակ ստացավ նախագահ դառնալուց անմիջապես հետո։ Նրան հարցրին. «Ինչի՞ համար եք դուք այն ստացել»։ Եվ նա չկարողացա բացատրել, հիշո՞ւմ եք։ Իսկ հետո Բայդենն ասաց․«Իսկ ի՞նձ»։ Նրանք էլ պատասխանեցին․«Սա ո՞վ է, գրողը տանի, ի՞նչ է նա արել»։ Օբաման մրցանակը հենց այնպես է ստացել»,-ասել է Թրամփը։
Ամերիկայի նախագահը նշել է նաև, որ մի քանի օր առաջ իրեն երկու անգամ ներկայացրել են Նոբելյան մրցանակի՝ արաբա-իսրայելական և Սերբիա-Կոսովո հակամարտությունների կարգավորմանն ուղղված ակտիվ ջանքերի համար։
Օբաման խաղաղության Նոբելյան մրցանակ էր ստացել միջազգային դիվանագիտության ամրապնդման ջանքերի համար։