ԵՐԵՎԱՆ, 13 սեպտեմբերի – Sputnik. 2012թ. ընտրություններին պատգամավորի թեկնածուի քաղաքացիության մասին տվյալներն անհետացել են Հայաստանի ազգային արխիվից։ Sputnik Արմենիայի հարցմանն ի պատասխան տեղեկությունը հայտնել են ՀՀ ոստիկանությունից:
Մեր խմբագրությունը օգոստոսին հարցում էր ուղարկել ոստիկանություն՝ խնդրելով պարզաբանել, թե ինչպես է Հայրապետյանն ընտրվել պատգամավոր 2007 և 2012 թվականներին՝ լինելով ոչ միայն Հայաստանի, այլև Ռուսաստանի քաղաքացի (ՀՀ Գլխավոր դատախազության տվյալներով՝ Հայրապետյանն այն ստացել է 2003 թվականի հունիսի 20-ին):
Հարցման հիման վրա ոստիկանությունում ծառայողական ստուգում է իրականացվել։ Պարզվել է, որ ՀՀ Ազգային ժողովի 2007 և 2012 թվականներին ընտրություններին մասնակցելու համար Ռուբեն Հայրապետյանին տեղեկանքի տրամադրման փաստաթղթային հիմքերը անձնագրային և վիզաների վարչությունում ոչնչացվել են՝ դրանց պահպանման ժամկետը լրանալու պատճառով:
Դատարանը չի հաստատել Ռուբեն Հայրապետյանին մեղսագրված արարքներից երկուսը. որոնք են դրանք
Միաժամանակ ոստիկանությունից հայտնում են, որ անձնագրային և վիզաների վարչության աշխատակիցներին (կամ տեղական անձնագրային սեղանների) տեղեկացնելու դեպքում ՀՀ քաղաքացիների կողմից օտարերկրյա քաղաքացիություն ձեռք բերելու մասին տվյալները մուտքագրվում են բնակչության պետական ռեգիստր:
Հետևաբար, 2007 և 2012 թվականների ընտրությունների ընթացքում պատգամավորության թեկնածուներին Հայաստանում բնակվելու, օտարերկրյա քաղաքացիության առկայության (կամ բացակայության) մասին տեղեկանքներ են տրամադրվել հենց պետական ռեգիստրի տվյալների հիման վրա:
Ընդ որում, ոստիկանության ներքին անվտանգության վարչությունից Sputnik Արմենիային տեղեկացրին, որ 2007 թվականի մայիսի 12-ի ընտրություններն անցկացվել են 1999 թվականի փետրվարի 5-ի Ընտրական օրենսգրքի հիման վրա:
Այս օրենսգրքի 97-րդ հոդվածի համաձայն՝ պատգամավոր կարող էր դառնալ 25 տարին լրացած, վերջին հինգ տարում ՀՀ քաղաքացի հանդիսացող և վերջին հինգ տարում մշտապես Հայաստանում բնակվող ցանկացած քաղաքացի։
Պատգամավորի թեկնածու դառնալիս այլ երկրի քաղաքացիության բացակայությունը ներառող շտկումերն ընդունվել են 2007թ․-ի փետրվարի 26-ին։ Բայց 2007թ․-ի ընտրություններն անցկացվել են ըստ հին օրենսգրքի, քանի որ այդ ժամանակ նախընտրական գործընթացն արդեն սկսվել էր։
Արդեն նոր օրենսգրքով տեղի են ունեցել 2012թ. խորհրդարանական ընտրությունները, որտեղ Հայրապետյանը կրկին պատգամավոր է ընտրվել։ Երկրորդ քաղաքացիություն ունենալու արգելքի մասին կարգավորումներն այդ ժամանակ արդեն գործել են։
ՀՀ կենտրոնական ընտրական հանձնաժողովում ներկայացված փաստաթղթերի ընդունման գործընթացը կազմակերպում է ԿԸՀ քարտուղարը՝ հանձնաժողովի անդամների և կուսակցության լիազոր ներկայացուցիչների մասնակցությամբ։ Կուսակցության կամ կուսակցությունների դաշինքի ներկայացրած փաստաթղթերում սխալներ, ջնջումներ, քերվածքներ, վրիպակներ նկատելու դեպքում ԿԸՀ-ն 48 ժամ է տալիս՝ անճշտությունները վերացնելու համար։
Ռուբեն Հայրապետյանի նկատմամբ հետախուզում է հայտարարվել. պաշտպանը զարմացած է
Ուսումնասիրելով պատգամավորի թեկնածուների փաստաթղթերը, ԿԸՀ-ն պետք է հիմնվի միայն լիազորված մարմնից տեղեկանքի առկայության կամ բացակայության վրա։ Հանձնաժողովն իրավասու չէ գնահատել պետական մարմնի կողմից տրամադրված տեղեկանքի բովանդակությունը։
Եթե ԿԸՀ-ում հիմնավոր կասկածներ են առաջանում թեկնածուների ներկայացրած տվյալների վերաբերյալ, ապա հանձնաժողովի ցանկացած անդամ կարող է առարկություն ներկայացնել՝ հանդես գալով թեկնածուի գրանցումը մերժելու առաջարկով: Առաջարկը դրվում է հանձնաժողովի անդամների քվեարկությամբ (որոշումն ընդունելու համար անհրաժեշտ է ձայների 2/3-ը)։
«Քաղաքացի Ռուբեն Ռաֆիկի Հայրապետյանը 2007 և 2012թթ․ ՀՀ Ազգային ժողովի հերթական ընտրությունների ժամանակ որպես պատգամավորի թեկնածու առաջադրվել և գրանցվել է համամասնական և մեծամասնական ընտրակարգերով։ Վերջինիս կողմից ՀՀ ԿԸՀ ներկայացվել են պատգամավորի թեկնածու առաջադրվելու և գրանցվելու համար անհրաժեշտ բոլոր փաստաթղթերը»,-նշված է հաղորդագրության մեջ։
2007 և 2012 թվականներին գործող օրենսդրության համաձայն՝ ԿԸՀ-ում առկա ընտրական բոլոր փաստաթղթերը պահպանության են հանձնվել «Հայաստանի ազգային արխիվ» ՊՈԱԿ։
Արխիվից ոստիկանությանն են փոխանցել 2007թ․-ին Հայրապետյանի կողմից ԿԸՀ ներկայացված ՀՀ քաղաքացի լինելու և վերջին հինգ տարում Հայաստանում բնակվելու մասին տեղեկանքների պատճենները։
«Իսկ 2012թ․-ի խորհրդարանական ընտրությունների պատգամավորության թեկնածուների կողմից ներկայացված նմանատիպ տեղեկանքներն արխիվում չեն հայտնաբերվել»,-ասված է հաղորդագրության մեջ։
Կատարված ծառայողական ուսումնասիրությամբ ՀՀ ոստիկանության անձնագրային և վիզաների վարչության կամ ենթական ստորաբաժանումների ծառայողների գործողություններում կարգապահական բնույթի խախտման հատկանիշներ ի հայտ չեն եկել։
Էլեկտրաշոկով հարվածել է ու սպառնացել․ ՔԿ-ն Ռուբեն Հայրապետյանին մեղադրանք է առաջադրել