ԵՐԵՎԱՆ, 29 օգոստոսի – Sputnik. ՀՀ վարչապետ Նիկոլ Փաշինյանը Facebook-ի իր էջում տեսանյութ է հրապարակել Լեռնային Ղարաբաղի Հանրապետության Գերագույն խորհրդի առաջին նախագահ Արթուր Մկրտչյանին և Արցախի Հանրապետության պաշտպանության բանակի N զորամասի 4-րդ հրաձգային վաշտի հրամանատար, կապիտան Արմենակ Ուրֆանյանին հետմահու «Արցախի հերոս» բարձրագույն կոչում շնորհելու արարողությունից։
«Մենք մեր պատմությունը չենք մոռանում, բայց ամեն օր, ամեն ժամ նայում ենք ապագային։ Սակայն այդ ապագան ճիշտ կառուցելու համար պետք է ճիշտ գնահատել նաև անցյալը »,–նշել է Փաշինյանը։
Նա վստահ է, որ այսօր մարտի գնացող ու սխրանքներ գործող մեր տղաները` զինվորները, սպաները, գեներալները, իրենց աչքի առաջ ունեն անցյալի հերոսներին:
«Սա մի ամբողջական գործ է, մի ամբողջական անելիք, և մենք այս գործը պիտի միասին անենք:Այս գործից ամենևին էլ անմասն չեն մեր նահատակները, որովհետև այսօր այս միջոցառմամբ մենք ընդգծում ենք նրանց ներկայությունը` այստեղ, հիմա, մեր կողքին»,–նշել է վարչապետը:
Հիշեցնենք`պարգևատրման արարողությանը ելույթ էր ունեցել նաև Արցախի Հանրապետության նախագահ Արայիկ Հարությունյանը։
Նա նշել էր, որ դեռևս ապրիլի 14-ին` նախագահական ընտրությունների օրը, քվեարկության գնալուց առաջ այցելել է արցախյան ազգային-ազատագրական շարժման աննկուն մարտիկ, քաղաքական ու պետական գործիչ, Լեռնային Ղարաբաղի գերագույն խորհրդի առաջին նախագահ Արթուր Մկրտչյանի շիրիմին: Եվ որպես յուրատեսակ երդում խոստացել է ընտրվելու դեպքում անել առավելագույնը՝ նրա կիսատ թողած գործը շարունակելու, նրա վեհ գաղափարները կյանքի կոչելու և բոլորի երազած հայրենիքը կերտելու համար:
Հարությունյանը նշել էր, որ դա երդում էր ինչպես Արթուր Մկրտչյանի, այնպես էլ հայրենիքի համար իրենց կյանքը զոհաբերած բոլոր հայորդիների առջև:
Հիշեցնենք` կապիտան Արմենակ Ուրֆանյանը 2016 թվականի ապրիլին սկսված Քառօրյա պատերազմի առաջին իսկ օրերից եղել է Արցախի առաջնային գծում։ Ուրֆանյանն իր հրամանատարության ներքո գործող չորրորդ հրաձգային վաշտի անձնակազմի հետ միասին երկարատև մարտ է մղել հանկարծակի հարձակում գործած հակառակորդի հետ։
Անձնակազմին հետ ուղարկելով՝ կապիտան Ուրֆանյանը միայնակ շարունակել է մարտը՝ այդ ընթացքում խոցելով մեկ տանկ և մոտ մեկ տասնյակ թշնամու զինվորներ։ Ի վերջո, ազերիների ձեռքը գերի չընկնելու նպատակով, իր մոտ մնացած վերջին նռնակով իր հետ միասին պայթեցրել է մոտեցող թշնամու խումբը՝ նրանց պատճառելով զգալի մարդկային կորուստներ։
Արթուր Մկրտչյանը ծնվել է 1959 թ. փետրվարի 16-ին Հադրութի շրջանի Ուխտաձոր գյուղում: 1976-1981թթ. սովորել է Երևանի պետական համալսարանի պատմության ֆակուլտետում: 1991թ. դեկտեմբերի 28 -ին Ուխտաձորի թիվ 37 ընտրատարածքից ընտրվել է ԼՂՀ առաջին գումարման Գերագույն խորհրդի պատգամավոր: 1992թ. հունվարի 8-ին ընտրվել է ԼՂՀ Գերագույն խորհրդի նախագահ: Կյանքից հեռացել է 1992թ. ապրիլի 14-ին: