ԵՐԵՎԱՆ, 27 օգոստոսի - Sputnik. ՀՀ նախագահ Արմեն Սարգսյանի հրամանագրով՝ հայտնի բժիշկ, սրտաբան Հրայր Հովակիմյանը (Հագոպ (Հրայր) Հովագուիմիան) պարգևատրվեց Հայրենիքի շքանշանով։ Լուրը հաղորդում է ՀՀ առողջապահության նախարարության մամուլի ծառայությունը՝ նշելով, որ դեռ տարեսկզբին վաստակաշատ բժշկին նման բարձր պարգևի արժանացնելու խնդրանքով նախարար Արսեն Թորոսյանը դիմել էր վարչապետին։
«Նախարարը խնդրել էր վարչապետին առաջարկել նախագահին առողջապահության զարգացման գործում Հայաստանին մատուցած բացառիկ ծառայությունների, սրտի բարդ վիրահատություններ իրականացնող նորարարական բժշկական կենտրոն ստեղծելու և մեծաթիվ նոր մասնագետներ պատրաստելու, բազմաթիվ մարդկային կյանքեր փրկելու և երկարամյա անձնուրաց աշխատանքի համար բժիշկ Հագոպ (Հրայր) Հովագուիմիանին Հայրենիքի շքանշանով պարգևատրելու համար»,- տեղեկացնում են նախարարությունից։
Միշուստինը Սարգսյանին Ստոլիպինի շքանշան է հանձնել
Այսօր արդեն ՀՀ նախագահը, հիմք ընդունելով վարչապետի միջնորդությունը՝ համաձայն Սահմանադրության 136րդ հոդվածի, ինչպես նաև «Հայաստանի Հանրապետության պետական պարգևների և պատվավոր կոչումների մասին» օրենքի 5.3-րդ հոդվածի 1-ին մասը պարգևատրել է բազմաթիվ կյանքեր փրկած բժշկին Հայրենիքի շքանշանով։
Հայրենիքի շքանշանը շնորհվում է «Հայաստանի ազգային հերոս» բարձրագույն կոչմանն արժանացած անձանց։
Նշենք, որ Հագոպ (Հրայր) Հովագուիմիանը ծնվել է Սիրիայի Հալեպ քաղաքում։ 1993 թ. նրա գլխավորությամբ հիմնադրվել է «Նորք-Մարաշ» բժշկական կենտրոնը։
Սրտային վիրաբուժության գծով վերապատրաստել է մեծ թվով հայաստանցի բժիշկների։ Արտասահմանյան մի շարք բժշկական ընկերությունների և ասոցիացիաների անդամ է։ Արժանացել է բազմաթիվ կոչումների ու պարգևների, այդ թվում՝ Երևանի պատվավոր քաղաքացու, ՀՀ ԳԱԱ պատվավոր դոկտորի, պարգևատրվել է Սուրբ Մեսրոպ Մաշտոց շքանշանով, «Հայրենիքին մատուցած ծառայությունների համար» 2-րդ աստիճանի մեդալով և այլն։