ԵՐԵՎԱՆ, 24 օգոստոսի - Sputnik. Գյումրու «Երեխաների տուն» մանկատանը իրականացրած թեստավորման արդյունքում կորոնավիրուս է հաստատվել 6 երեխայի և 7 աշխատակցի մոտ։ Լուրը Sputnik Արմենիայի հետ զրույցում հայտնեց Աշխատանքի և սոցիալական հարցերի նախարարի մամուլի խոսնակ Սոնա Մարտիրոսյանը։
«Բոլորն ասիպմտոմ են տանում հիվանդությունը, բացի մեկ աշխատակցից, որի մոտ նաև թոքաբորբ է ախտորոշվել։ Քանի որ առանց որևէ ախտանշանների է ընթացող վիրուսը, նրանց մոտ այն հայտնաբերվել է հերթական` 14 օրը մեկ իրականացվող թեստավորման արդյունքում»,–ասաց նա։
Նա տեղեկացրեց, որ արտակարգ դրությամբ պայմանավորված մանկատան աշխատակիցները 14-օրյա ռեժիմով են աշխատանքի հաճախում և յուրաքանչյուր հերթափոխից առաջ բոլորը թեստավորվում են։
Մարտիրոսյանը նշեց, որ երեխաներն աշխատողներից են վարակվել, քանի որ հաստատությունն աշխատում է փակ ռեժիմով։
Նրա խոսքով` երեխաները գտնվում են երևանյան հիվանդանոցներում՝ երկուսը՝ «Արաբկիր», 4-ը՝ «Սուրբ Գրիգոր Լուսավորիչ» ԲԿ–ներում։ Երեխաներին խնամում են վարակակիր աշխատակիցներից չորսը, քանի որ նրանք հատուկ խնամք են պահանջում։
«Գյումրիի «Երեխաների տունը» նախատեսված է հաշմանդամություն և որոշակի հիվանդություններ ունեցող երեխաների համար։ Այդ երեխաների խնամքը մի փոքր սպեցիֆիկ է, ինչի համար էլ մենք հարմարն ենք գտել, որ երեխաներին խնամողներն էլ հիվանդանոցում նրանց կողքին լինեն»,–պարզաբանեց Մարտիրոսյանը։
Մարտիրոսյանի հաղորդմամբ՝ այս պահին հաստատությունում աշխատում են օգոստոսի 21-ին հերթափոխի գնացած աշխատակիցները, որոնց բոլորի թեստի պատասխանը բացասական է։
Գյումրու «Երեխաների տունը» նախատեսված է 165 երեխայի համար։
Որքան է պետք սպասել․ COVID-19-ի դեմ պատվաստումների սկզբում ՌԴ–ում դեղամիջոցի դեֆիցիտ կլինի