ՀՀ վարչապետ Նիկոլ Փաշինյանը Facebook-ի իր էջում գրել է, որ 2020 թվականի հուլիս ամսվա տվյալներով` աշխատատեղերի քանակը Հայաստանում կազմել է 613 հազար` նախորդ ամսվա 610 հազար 300-ի փոխարեն։
Հայաստանի գործատուների միության նախագահ Գագիկ Մակարյանի դիտարկմամբ` թվերը, որոնց նկատմամբ շատերի մոտ կա թերահավատություն, իսկապես հետաքրքիր են։ Մենք 620 հազար աշխատող արդեն իսկ ունեինք մինչև համավարակը։ Ըստ նրա` մայիսին այդ ցուցանիշը նվազել էր ու հասել 590 հազարի, բայց թվերն ամռան սկզբից սկսեցին վերականգնվել, և դրանում ներառված են պետական բոլոր աշխատողները։
«Նախ նշեմ, որ պետական համակարգում աշխատողների թվաքանակը էականորեն չէր կրճատվել, պետությունը շարունակել է տալ և՛ աշխատավարձ, և՛ պարգևավճարներ, իսկ մասնավոր սեկտորում փորձում են հիմնովին վերականգնել աշխատատեղերը, ընդ որում`արդյունաբերության, առևտրի մեջ։ Այն ոլորտները, որոնք կանգնել են կորոնավիրուսի ժամանակահատվածում և չեն զբաղվել արտադրանքի թողարկմամբ, հիմա ակտիվացել են»,– նշում է Հայաստանի գործատուների միության նախագահը։
Աշխատատեղերի պահպանման հարցում աշխատավարձի ֆոնդի աճի տեսանկյունից լուրջ դերակատարություն ունեցան նշված ֆոնդի ավելացումները, որոնց նպաստեցին պետական երեք միջոցառումները (5-րդ, 8-րդ և 23-րդ)։
Այն ընկերությունները, որոնք պահպանել էին աշխատատեղերը, ստացան գումարներ, որոնք ուղղված էին նաև աշխատողներին նվազագույն վարձատրություն տալուն։
«Աջակցման ծրագրերի արդյունքում տասնյակ միլիոնավոր դալարների չափով գումար է մտել կազմակերպություններ։ Պետք է հաշվի առնել նաև այն վիճակագրությունը, թե որ ոլորտում որքան մարդ է աշխատում։ Օրինակ` արդյունաբերության մեջ զբաղված է 105 հազար մարդ, առևտրի ոլորտում` 120 հազար մարդ, որոնց ակտիվացումը նույնպես նպաստեց դրական ցուցանիշի գոյացմանը։ Նաև ՊԵԿ–ի հայտարարած տվյալներն են վկայում, որ այդ թվերը ճիշտ են»,– նշում է Հայաստանի գործատուների միության նախագահը։
Մակարյանը հաշվի է առնում նաև այն հանգամանքը, որ պետական համակարգն իր ծրագրերով նույնպես էական դերակատարություն ունեցավ, թեև պետք է նշել, որ շատերին այդ ծրագրերն այդպես էլ հասանելի չեղան։
Ըստ նրա` աշխատատեղերի դինամիկայի մեջ պետք է հավատալ վարչապետի ներկայացրած թվերին։
Գյուղերում միջավայրը ժամանակակից դարձնելու խնդիր կա. ի՞նչ տարբերակ է առաջարկում Փաշինյանը