ԵՐԵՎԱՆ, 23 օգոստոսի – Sputnik. Բելառուսի նախագահ Ալեքսանդր Լուկաշենկոն ժամանել է Բելառուսի Անկախության պալատ, որի հարևանությամբ բողոքի ակցիա են անում ցուցարարները։ Լուրը հայտնում է Բելառուսի նախագահի մամուլի ծառայությանը մոտ գտնվող Telegram-ալիքը ՝ Пул первого–ն։
Լուկաշենկոն Անկախության պալատ է այցելել մեկ ժամ առաջ։ Արդեն իսկ հայտնվել են կադրեր, որտեղ երևում է` Լուկաշենկոն դուրս է գալիս ուղղաթիռից զրահաբաճկոնով և ինքնաձիգով:
Ի դեպ, ինքնաձիգը փամփշտակալ չուներ։
Ավելի վաղ ցուցարարները «Մինսկ – հերոս քաղաք» հուշակոթողից շարժվել են դեպի Լուկաշենկոյի նստավայր՝ Անկախության պալատ, սակայն նրանց շարժումն արգելափակել են հատուկջոկատայիններն ու հատուկ տեխնիկան։
Օգոստոսի 9–ին Բելառուսում կայացան նախագահական ընտրություններ։ ԿԸՀ–ի տվյալներով` Ալեքսանդր Լուկաշենկոն հավաքել է ձայների 80,1%–ը, երկրորդ տեղում է Սվետլանա Տիխանովսկայան` քվեների 10,12%–ով։ Ընդդիմությունն այս արդյունքները չի ճանաչել, իսկ Տիխանովսկայան մեկնել է Լիտվա։
Երկրում չարտոնված բողոքի ցույցեր են տեղի ունենում, սակայն դրանք ճնշվում են ուժայինների կողմից։ Ցուցարարների դեմ արցունքաբեր գազ, ջրցաններ, լուսաձայնային նռնակներ և ռետինե փամփուշտներ են կիրառվում։
Մինսկում ուժայինները ծեծի են ենթարկել ՀՀ քաղաքացու
Պաշտոնական տվյալներով` ձերբակալվել է շուրջ 7 հազար մարդ։ Բելառուսի ՆԳՆ–ի փոխանցմամբ` անկարգությունների ժամանակ տուժել են հարյուրավոր մարդիկ, այդ թվում` իրավապահ մարմինների 103 աշխատակից։ ՆԳՆ–ի տվյալներով` ցուցարարներից մեկը զոհվել է` փորձելով ոստիկանության ուղղությամբ ինքնաշեն պայթուցիկ սարք նետել։
«Պատրաստ եմ ազգային առաջնորդ դառնալ». Տիխանովսկայան նոր ուղերձ է հղել բելառուսցիներին