ԵՐԵՎԱն, 20 օգոստոսի- Sputnik. Դատախազությունը տեղեկացնում է, որ «Գյումրի բժշկական կենտրոնի» մի խումբ բժիշկ-վիրաբույժներ կատարել են վիրահատություններ, որոնք գրանցել են որպես պետպատվերով իրականացվող ծառայություն, սակայն հիվանդներից պահանջել են ամբողջ գումարը։
«Մասնավորապես, վիրահատությունները ձևակերպել են որպես համավճարի շրջանակում մատուցվող ծառայություններ և կազմել են այդ կապակցությամբ կեղծ պայմանագրեր: Արդյունքում հիվանդներից գանձված գումարներից ԲԿ–ի դրամարկղ մուտքագրվել է միայն համավճարի շրջանակում սահմանված գումարը` 50.000-65.000 դրամ»,–նշված է հաղորդագրության մեջ։
Հիվանդների բուժման դիմաց վճարման ենթակա մնացած գումարները բժիշկները ձևակերպվել են որպես ԲԿ–ի հաշվեհամարին պետբյուջեից կատարված փոխանցումներ։ Նման եղանակով պետությունից և հիվանդներից խարդախությամբ հափշտակվել է 1.8 մլն դրամ։
ՀՀ քրեական օրենսգրքի 178-րդ հոդվածի 2-րդ մասի տարբեր կետերով (խարդախություն), որոշ դեպքում նաև 325-րդ հոդվածի 1-ին մասով (փաստաթղթեր կեղծելը) մեղադրանքներ են առաջադրվել ԲԿ–ի մի խումբ բժիշկների: Հետագայում առաջադրված մեղադրանքների մի մասով համաներման ակտի կիրառման, վաղեմության ժամկետն անցնելու, գործուն զղջալու հիմքով բժիշկների նկատմամբ քրեական հետապնդումը դադարեցվել է և քրեական գործի վարույթը կարճվել:
Նոր գործիքակազմն ընդդեմ կոռուպցիայի. ի՞նչ անել, որ այն առավել արդյունավետ «աշխատի»
Այդուհանդերձ, քննությամբ, փաստորեն, հաստատվել է, որ վերը նշված հանցավոր արարքները կատարելուն նպաստել է նաև այն հանգամանքը, որ բժշկական օգնությունից օգտվող քաղաքացիները բավարար տեղեկություններ չեն ունեցել ինչպես անվճար, այնպես էլ արտոնյալ պայմաններում բուժում ստանալու՝ կառավարության սահմանած կարգի վերաբերյալ:
Ելնելով դրանից՝ ՀՀ գլխավոր դատախազության կոռուպցիոն հանցագործությունների գործերով վարչությունից միջնորդագիր է ուղղվել Շիրակի մարզպետ Տիգրան Պետրոսյանին, որում բարձրացվել է նման դեպքերը բացառելու ԲԿ–ների ղեկավարների հետ քննարկումներ իրականացնելու հարցը։
Արդյունքում հիվանդանոցային բուժօգնություն և սպասարկում իրականացնող հաստատությունների տնօրեններին հանձնարարվել է պետության կողմից երաշխավորված անվճար բժշկական օգնության և սպասարկման կարիք ունեցող պացիենտներին տրամադրել իրազեկման թերթիկներ: