ԵՐԵՎԱՆ, 20 օգոստոսի - Sputnik. Աղթամար կղզու Սուրբ Խաչ եկեղեցում պատարագ կմատուցվի։ Վանի տեղական իշխանությունները պատրաստվում են սեպտեմբերի 6-ին մատուցվելիք պատարագին։ Տեղեկությունը հայտնում է ermenihaber–ը՝ հղում անելով Վանի նահանգապետ և Վան քաղաքի քաղաքապետի պաշտոնակատար Մեհմեթ Էմին Բիլմեզին։
Նշվում է, որ այս տարի պատարագի մասնակիցների թիվը սահմանափակ է լինելու։
«Աղթամար կղզին և Վանա լիճը աշխարհի մշակութային ժառանգություններն են, որոնք ի պահ են տրվել մեզ՝ վանեցիներիս։ Աղթամար կղզու վրա պատմական եկեղեցի կա։ Մշակույթի ու տուրիզմի նախարարության հետ ստորագրված արձանագրության համաձայն՝ ամեն տարի սեպտեմբերի 2-րդ կիրակին եկեղեցում պատարագ է մատուցվում։ Այս տարի էլ, սեպտեմբերի 6-ին այնտեղ, համաճարակային կանոնների պահպանմամբ, ավելի քիչ մասնակցությամբ պատարագ կմատուցվի»,–ասել է Բիլմեզը։
Ուժգին պայթյունի հետևանքով Բեյրութում մեծ վնասներ է կրել հայկական Սուրբ Գևորգ եկեղեցին
Հաղորդվում է, որ Կ․Պոլսի հայոց պատրիարքարանից պատարագն անցկացնելու համար ժամանելու է 25 հոգանոց անձնակազմ։
Հիշեցնենք, որ Աղթամարի Սբ․ Խաչ եկեղեցին կառուցվել է 915-921թթ․ Վասպուրականի թագավոր Գագիկ Արծրունու հրամանով։ Եկեղեցու ճարտարապետը հայտնի նկարիչ և քանդակագործ Մանվելը (Մոնուել) է։ 1113-1895թթ այնտեղ գործել է Աղթամարի առանձին կաթողիկոսարանը, որի վերացումից հետո նրան պատկանող վանքերն ու եկեղեցիներն անցել են Պոլսի հայոց պատրիարքարանին։ Տեղաբնակները կղզին ու եկեղեցին լքել են 1915 թվականին Հայոց ցեղասպանությունից հետո։
95 տարվա դադարից հետո՝ 2010 թվականից ի վեր, ամեն տարվա սեպտեմբերին՝ Խաչվերացի տոնին հաջորդող կիրակի օրը, Սուրբ Խաչ եկեղեցում պատարագ է մատուցվում: Սակայն 2015-2017 թվականների ընթացքում շրջանում քուրդ զինյալների և թուրքական զինուժի միջև պարբերական բախումների հետևանքով պատկան մարմինները պատարագ անցկացնել չէր արտոնել: Երեք տարի անց՝ 2018-ին, եկեղեցում կրկին պատարագ տեղի ունեցավ:
Ալիև՛, ձեռքերդ հեռու հայկական եկեղեցուց. Լապշինը բացահայտել է Բաքվի հերթական սադրանքը