ԵՐԵՎԱՆ, 19 օգոստոսի — Sputnik. Ազգային ժողովի «Իմ քայլը» խմբակցության պատգամավոր Հայկ Սարգսյանն այսօր հրավիրվել է ԱԺ կոռուպցիայի կանխարգելման հանձնաժողով։ Sputnik Արմենիայի հետ զրույցում լուրը հայտնեց հանձնաժողովի նախագահ Հայկուհի Հարությունյանը:
«Պարզապես խնդրել ենք Սարգսյանին գալով պարզաբանում ներկայացնի, այլ ոչ թե գրավոր։ Արտառոց ոչինչ չկա, ընթացակարգն է այդպես»,–ասաց Հարությունյանը։
Նշենք, որ հանձնաժողովն ուսումնասիրում է, թե Սարգսյանը որևէ առնչություն ունի Սևանի «Սպիտակ շորժա» հանգստի գոտու հետ։
Հիշեցնենք, որ հուլիսի 26-ին Սևանի «Սպիտակ Շորժա» լողափում տեղի էր ունեցել Գոռ Սուջյանի մենահամերգը։ Խնջույքից տեսագրություն և լուսանկարներ էին հրապարակվել, որոնցում երևում էր նաև Ազգային ժողովի «Իմ քայլը» խմբակցության պատգամավոր Հայկ Սարգսյանը:
Նա դիմակի չէր դրել, որի համար ավելի ուշ տուգանվել էր։ Սարգսյանն ինքը պարզաբանում էր տարածել` ասելով, որ ընդամենը մի պահ դիմակ չի դրել։ Մամուլում տարածված լուրերի համաձայն` այս լողափը պատկանում է հենց նրան կամ առնչություն ունի նրա հետ, սակայն Սարգսյանը դա էլ է հերքում։
Օգոստոսի 3-ին շրջակա միջավայրի նորանշանակ նախարար Ռոմանոս Պետրոսյանը հանձնարարել էր ամենասեղմ ժամկետում կասեցնել Սևանի «Սպիտակ Շորժա» (White Shorja) հանգստի գոտու գործունեությունն ու ապամոնտաժել տարածքում տեղադրված ապօրինի տաղավարները։ Նախարարը հայտարարել էր նաև, որ տնտեսվարողը տարածքի նկատմամբ որևէ իրավական կարգավիճակ չունի։
Պատգամավոր Հայկ Սարգսյանը կտուգանվի. «Իմ քայլի» ղեկավարը զրուցել է նրա հետ
Սևանի «Սպիտակ Շորժա» (White Shorja) հանգստի գոտու տարածքի իրական սեփականատերը` ճարտարապետ Ռուբեն Չախմախչյանը, Sputnik Արմենիայի հետ զրույցում հայտնել էր` մամուլի հրապարակումներից է տեղեկացել, որ իր տարածքում ինչ–որ մարդիկ ապօրինի գործունեություն են ծավալել։ Սեփականատերն այդ մասին իմացել է այն ժամանակ, երբ շրջակա միջավայրի նախարարն արդեն հայտարարել էր այդ գործունեությունը կասեցնելու մասին։