ԵՐԵՎԱՆ, 17 օգոստոսի — Sputnik. Բելառուսի նախագահ Ալեքսանդր Լուկաշենկոն հայտարարել է, որ պետության ղեկավարի նոր ընտրություններ չեն լինելու։ Տեղեկությունը հայտնում է Sputnik Բելառուսը։ Լուկաշենկոն այդ մասին խոսել է այսօր անիվների քարշակների Մինսկի գործարանի աշխատակիցների հետ հանդիպման ժամանակ։ Նա ակնարկել է նաև, որ իր հեռանալու դեպքում բելառուսական արդյունաբերությունը կվերանա։
«Երբեք հույս չունենաք, որ ես ճնշման տակ որևէ բան կանեմ։ Նոր ընտրություններ չեն լինելու», - ասել է Լուկաշենկոն։
Նա վստահեցրել է, որ պատրաստ է կիսել նախագահական լիազորությունները՝ աշխատելով օրենսդրության վրա։ Բայց այդ ամենը կարվի ոչ ճնշման տալ ու ոչ փողոցի միջոցով։
Լուկաշենկոն հիշեցրել է, որ այս պահին Բելառուսի Սահմանադրության փոփոխությունների տարբերակներ են մշակվում։ Դրանք նաև իշխանության լիազորությունների վերաբաշխում են ենթադրում։
Հիշեցնենք, որ պաշտոնական տվյալների համաձայն ՝ օգոստոսի 9-ի ընտրություններում հաղթել է գործող նախագահ Ալեքսանդր Լուկաշենկոն, նրա օգտին է քվեարկել ընտրողների 80,1 տոկոսը, նրա հիմնական հակառակորդ Սվետլանա Տիխանովսկայայի օգտին՝ 10,12 տոկոսը: Տիխանովսկայան այժմ Լիտվայում է:
Լուկաշենկոն գործարանի աշխատողների հետ հանդիպման է մեկնել ուղղաթիռով
Քաղաքացիները, սակայն, ընտրությունների արդյունքները կեղծված են համարում։ Ոստիկանության կոշտ գործողությունները վրդովմունքի ավելի մեծ ալիք են բարձրացրել։