ԵՐԵՎԱՆ, 17 օգոստոսի - Sputnik. Բարձրագույն որակավորման կոմիտեի (ԲՈԿ) նախագահ Սմբատ Գոգյանը համաձայն չէ ՀՀ կրթության, գիտության, մշակույթի և սպորտի նախարարության կայացրած որոշման հետ։
ԿԳՄՍՆ-ն կեսօրին տեղեկություն տարածեց, որ ՀՊՏՀ ռեկտոր Դիանա Գալոյանի՝ նախարարություն ներկայացրած վարչական բողոքների քննությունն ավարտված է, Գալոյանը պահպանում է տնտեսագիտության դոկտորի գիտական կոչումը։ Մինչդեռ հուլիսի 17-ին` այն նույն օրը, երբ Գալոյանն ընտրվել էր ՀՊՏՀ ռեկտոր, ԲՈԿ-ը որոշել էր անվավեր ճանաչել նրա` տնտեսագիտության դոկտորի գիտական աստիճանը: Հիմնավորումը Դիանա Գալոյանի դոկտորական ատենախոսության մեջ տեղ գտած գրագողության փաստերն էին։
Գոգյանը Facebook–ի ուղիղ եթերում հայտնեց, որ արդեն տևական ժամանակ է` իր հասցեին մեղադրանքներ են հնչում, թե ինքը խտրական վերաբերմունք է ցուցաբերել` ինչո՞ւ է Դիանա Գալոյանը զրկվում գիտական կոչումից, իսկ ՀՊՏՀ նախկին ռեկտոր Ռուբեն Հայրապետյանը՝ ոչ։ (Հայրապետյանի անվան շուրջ ամիսներ առաջ նմանօրինակ սկանդալ էր հասունացել։ Նրան մեղադրում էին դոկտորական ատենախոսությունում գրագողություն կատարելու մեջ, և նա 2019 թվականի օգոստոսին թողեց պաշտոնը):
Նույն իրավիճակում տարբեր լուծումներ. Հայրապետյանը ԿԳՄՍ-ին մեղադրում է հովանավորչության մեջ
Գոգյանի խոսքով՝ ԲՈԿ-ը գիտական աստիճանից կզրկեր նաև Ռուբեն Հայրապետյանին, եթե դրա ժամանակն ունենար։ Դա անելու ժամանակն ուներ ԿԳՄՍՆ-ն, բայց չարեց։
ԲՈԿ նախագահը մանրամասնեց` այն, որ Հայրապետյանի ատենախոսության մեջ խնդիրներ կան, հանձնաժողովը նախորդ տարվա օգոստոսի 23-ին է արձանագրել։ Ո՞ր կառույցն իրավասություն ունի զրկելու դոկտորին գիտական աստիճանից. այս հարցի պատասխանը ստանալու համար դեկտեմբերին գրություն է ուղարկվել ՀՀ արդարադատության նախարարություն։ Դեկտեմբերի 26-ին պատասխան է եկել, որ ԿԳՄՍՆ-ն` որպես ԲՈԿ վերադաս կառույց, իրավասու է վարչական վարույթ հարուցել, ուսումնասիրել հարցն ու որոշում կայացնել։
Որոշ ժամանակ անց ևս մեկ հարցում է ուղարկվել Արդարադատության նախարարության` արդյոք ԲՈԿ-ը կարո՞ղ է չեղյալ համարել ԲՈԿ-ի կայացրած որոշումները։ Գոգյանի խոսքով՝ ԿԳՄՍՆ-ն գրության պատասխանը ստացել է փետրվարի 10-ին, իսկ իրենց պատասխանը փոխանցվել է փետրվարի 19-ին։ Պարզվել է՝ այո, ԲՈԿ-ն իրավասու է դա անել։
Գրությունը ստանալուց անմիջապես հետո ԲՈԿ-ում ուսումնասիրել են «Վարչարարության մասին» օրենքն ու պարզել, որ խախտումն արձանագրելուց հետո առավելագույնը վեց ամսվա ընթացքում վարչական մարմինն իրավունք ունի վարույթ հարուցելու, խնդիրն ուսումնասիրելու և որոշում կայացնելու։
«Դա փետրվարի 19-ն էր՝ հինգշաբթի, մենք ունեինք ընդամենը երկու աշխատանքային օր այդ ամենն անելու համար մինչև վեցամսյա ժամկետի լրանալը, ինչը, բնականաբար, մենք չէին կարող հասցնել»,- ասաց Գոգյանն ու հիշեցրեց, որ Ռուբեն Հայրապետյանի ատենախոսության խնդիրներն արձանագրվել էին օգոստոսի 23-ին, հետևաբար վեցամսյա ժամկետը լրանում էր փետրվարի 23-ին։
Գոգյանի խոսքով՝ ինքը դեռ փետրվարի 26-ին գրություն էր ուղարկել նախարարություն՝ խնդրելով պատասխանատու անձանց հետ հանդիպում կազմակերպել, գրությունը մակագրվել էր փոխնախարար Գրիշա Թամրազյանին, առայսօր հանդիպումը ո՛չ մերժվել է, ո՛չ իրականացվել։ «Եթե գրությանն ընթացք տրվեր, մարտ-ապրիլ ամիսներին կարելի էր ամեն ինչ կազմակերպել և սկսել գիտական աստիճաններից զրկելու գործընթացը»,– ասաց Գոգյանը։
Քանի որ սպասված հանդիպումն այդպես էլ չի կայացել, ԲՈԿ-ը ստիպված է եղել կենտրոնանալ այդ պահին առկա ակտիվ դեպքի վրա, որը, ըստ Գոգյանի, Դիանա Գալոյանի ատենախոսության հարցն էր։
ԿԳՄՍՆ կայացրած որոշումը Սմբատ Գոգյանը՝ որպես ԲՈԿ նախագահ, չի ընդունում. ասում է՝ որոշումը հնարավոր է վիճարկել դատական կարգով, փորձում են կառավարության միջոցով էլ բողոքարկել։
«Մենք առաջնորդվել ենք ճիշտ աշխատելու սկզբունքով, կայացրել ենք ճիշտ որոշումներ, հիմա, ինչպես ասում են, կացինը նախարարության ձեռքն է, նա կարող է ցանկացած որոշում ցանկացած իրավական մեկնաբանությամբ հաստատել կամ մերժել»,- նշեց Գոգյանը։
ԲՈԿ նախագահը մի կարևոր փաստ էլ նշեց՝ տիկին Դիանա Գալոյանն իր դոկտորական ատենախոսության հետ կապված ոչ մի բովանդակային առարկություն չի ունեցել։