ԵՐԵՎԱՆ, 17 օգոստոսի - Sputnik. 2020 թվականի առաջին կիսամյակի ընթացքում ՀՀ քննչական կոմիտեի վարույթում քննվել է երեխաների նկատմամբ կատարված հանցագործությունների վերաբերյալ 206 քրեական գործ, նախապատրաստվել է 102 նյութ: Կոմիտեի լրատվական ծառայության հաղորդմամբ՝ հարուցվել են քրեական գործեր Քրեական օրենսգրքի տարբեր հոդվածներով, այդ թվում՝ սպանության, անզգուշությամբ մահ պատճառելու, ինքնասպանության հասցնելու, դիտավորությամբ առողջությանը ծանր վնաս պատճառելու, բռնաբարության և այլ հոդվածներով։
Քրեական գործերի մեծ մասը հարուցվել են ծեծի, սեռական հարաբերություն 16 տարին չլրացած անձի հետ կամ սեքսուալ բնույթ գործողություններ կատարելու, սեքսուալ բնույթի բռնի գործողություններ, անառակաբարո գործողություններ կատարելու հոդվածներով։
«Վերը նշված քրեական գործերով 97 անձ ներգրավվել է որպես մեղադրյալ, ընդ որում՝ 1 անձ եղել է 14-16 տարեկան, 5-ը՝ 16-18, 53-ը՝ 18-35, 38-ը՝ 35 տարեկանից բարձր: 97 անձանցից 11-ն ունեցել է բարձրագույն կրթություն, 73-ը՝ միջնակարգ, 4-ը՝ միջին մասնագիտական, 9-ը՝ տարրական: Նշված անձանցից 6-ը նախկինում եղել է դատապարտված»,- նշված է կոմիտեի տարածած հաղորդագրության մեջ։
Վարույթում գտնվող գործերով 197 տուժողներից 97-ը՝ մինչև 12 տարեկան են, 23-ը՝ 12-14 տարեկան, 55-ը՝ 14-16 տարեկան, 22-ը՝ 16-18 տարեկան:
Հաճախ ընտանեկան բռնության են ենթարկել ամուսինը, հայրը և զավակը. ՔԿ-ն տվյալներ է հրապարակել
«2020 թվականի առաջին կիսամյակի ընթացքում ավարտվել է երեխաների նկատմամբ կատարված հանցագործությունների վերաբերյալ 100 քրեական գործ: 57 քրեական գործի վարույթ կարճվել է, որոնցից 40-ը` արդարացման հիմքով, իսկ 17-ը` ոչ արդարացման: Մեղադրական եզրակացությամբ դատարան է ուղարկվել 43 քրեական գործ՝ 45 անձի վերաբերյալ»,- տեղեկացնում է քննչական մարմինն ու հավելում, որ կասեցվել է 16 քրեական գործով վարույթ, դրանցից 4-ը` անձի հետախուզման մեջ գտնվելու հիմքով, 12-ը՝ այլ հիմքով:
76 քրեական գործ մնացել է անավարտ։