Դեռ 2019թ.–ի դեկտեմբերի 12-ի կառավարության նիստում վարչապետ Նիկոլ Փաշինյանը հայտարարել էր, որ ամբողջ պետական համակարգը դիմադրում է հեղափոխությանը, և այդ դիմադրությունն ինքը կոտրելու է, որ ուրիշ տարբերակ չկա։
Աղասի Մարգարյանի դիտարկմամբ` երբ վարչապետը նշում է համակարգում առկա ներքին դիմադրության մասին, ապա այդ դիմադրությունն ինքնի չի ենթադրում կոնկրետ գործողություն: Այսինքն` այդ դիմադրությունը կարող է արտահայտվել ոչ թե որևէ գործողությամբ պետական կառավարման համակարգի ստորին, միջին կամ վերին օղակներում, այլ ավելի շուտ նրանց անգործությամբ, ինչը նույնպես բերում է դիմադրության։
«Չեմ կարծում, որ մի քանի ամսում այդ խնդիրը կհաղթահարվի, որովհետև այն խորքային բնույթ ունի և ավելի շատ կապված է համակարգային աշխատանքների հետ, այսինքն` այստեղ խնդիրը պայմանավորված է ոչ թե անձերով, այլ համակարգի գործունեության արդյունավետությամբ։ Չեմ կարծում, որ կադրային փոփոխություններով հնարավոր է շատ արագ լուծել այդ խնդիրը»,– նշում է վերլուծաբանը։
Աղասի Մարգարյանի կարծիքով` կադրային փոփոխությունները կարևոր են, սակայն ոչ պակաս կարևոր է այն, թե նշված փոփոխությունների արդյունքում ընտրված մարդիկ ինչպիսի համակարգ են գալիս։ Ըստ նրա` կա նաև հին համակարգից նորին անցնելու և ադապտացվելու խնդիրը, որովհետև եղան շատ դեպքեր, երբ որոշակի հարթակներում և շրջանակներում հայտնվում էին փաստաթղթեր, օրենքների նախագծեր, որոնք նախատեսված էին զուտ գերատեսչությունների ներքին շրջանառության համար։ Նման դեպքերում գործ ունեինք ոչ թե ադապտացման կամ համընթաց սինխրոնիզացիայի, այլ անհատների հետ, ովքեր անձնական խնդիրներ լուծելու համար կազմակերպում էին փաստաթղթերին առնչվող արտահոսք։
Փաշինյանը խոսել է հեղափոխության չիրականացած հույսերի մասին
Վերլուծաբանի կարծիքով` նոր կադրերն այդուհանդերձ հիմնականում կարողանում են ադապտացվել առկա պայմաններին` ընդունելով ներհայաստանյան քաղաքական կյանքի ռեալ իրողությունները, և ընկալում են փոփոխությունների ամբողջ լայնույթը, որոնք տեղի են ունեցել վերջին երկու տարիներին։ Բացի դրանից, հին համակարգում աշխատած արհեստավարժ մարդկանցից շատերն, ըստ նրա, նույնպես պատկերացրել են խնդիրների ամբողջ սպեկտրը, ներկապնակը, ինչպես նաև հասարակական կյանքի բոլոր ոլորտներում գրանցված փոփոխությունների բնույթը, հետևաբար նրանց պարագայում ադապտացիայի խնդիր նույնպես չկար։