ԵՐԵՎԱՆ, 6 օգոստոսի - Sputnik. Հետաքննությունների պետական բյուրոն քրեական գործ է հարուցել Ուկրաինայի արտաքին գործերի նախարարի տեղակալ Վասիլի Բոդնարի դեմ՝ «Հայոց ցեղասպանություն» տերմինն արգելելու համար: Տեղեկությունը հայտնում է Analitikaua.net-ը՝ հղում անելով Գերագույն ռադայի «Ուկրաինա-Հայաստան» բարեկամության խմբի փոխնախագահ, իշխող «Ժողովրդի ծառա» կուսակցության անդամ Դարյա Վոլոդինային։
Փոխարտգործնախարարը մեղադրվում է Ուկրաինայի քրեական օրենսգրքի 367-րդ հոդվածի հատկանիշներով (պաշտոնեական դիրքի չարաշահում):
«Ոչ ոք իրավունք չունի իր սուբյեկտիվ կարծիքը պարտադրել ամբողջ երկրին՝ օգտագործելով պաշտոնեական դիրքը, երբ այն միջազգային ասպարեզում բացասաբար է անդրադառնում պետության հեղինակության վրա»,- ասել է Վոլոդինան:
Հիշեցնենք՝ Հայոց ցեղասպանության տարելիցի նախօրեին Ուկրաինայի արտգործնախարարությունը երկրի խորհրդարանի պատգամավորներին կոչ էր արել զերծ մնալ հայ համայնքի կազմակերպած հիշատակի միջոցառումներին մասնակցելուց և հրապարակային հայտարարություններում 1915 թվականի իրադարձությունները ցեղասպանություն չորակել: