ԵՐԵՎԱՆ, 5 օգոստոսի – Sputnik. Լիբանանում ՀՀ դեսպանությունը մշտական կապի մեջ է Լիբանանում գտնվող հայ խաղաղապահների հետ: Տեղեկությունը հայտնում է ՀՀ ԱԳ նախարարի մամուլի քարտուղար Աննա Նաղդալյանը:
Դեսպան Վահագն Աթաբեկյանն այսօր առավոտյան ևս կապ է հաստատել հայ խաղաղապահների հետ:
«Դեսպանի հաղորդմամբ` խաղաղապահներն իրենց ծառայությունն իրականացնում են հարավային սահմանի ուղղությամբ, որը բավական հեռու է տեղակայված դեպքի վայրից։ Խաղաղապահների կյանքին վտանգ չի սպառնում, և նրանք շարունակում են իրականացնել իրենց բնականոն ծառայությունը»,- հայտնում է ԱԳՆ խոսնակը:
Հայկական խաղաղապահ ստորաբաժանումը մասնակցում է «Լիբանանում Միացյալ ազգերի կազմակերպության ժամանակավոր ուժեր» (UNIFIL) առաքելությանը:
Բեյրութում երեկ երեկոյան տեղի ունեցած պատահարից հետո առաքելությունը հայտարարություն էր տարածել այն մասին, որ մի քանի խաղաղապահներ տուժել են ու բժշկական օգնություն ստանալու համար տեղափոխվել հիվանդանոցներ: Թե որ երկրի ԶՈՒ ներկայացուցիչներն են վնասվածքներ ստացել, հաղորդագրության մեջ չէր նշվում:
Բեյրութի քաղաքապետն արտասվել է, երբ խոսել է պայթյունի զոհերի մասին. տեսանյութ
Հիշեցնենք` օգոստոսի 4-ին Բեյրութի նավահանգստի շրջանում հզոր պայթյուն է որոտացել։ Վերջին տվյալներով՝ պայթյունի հետևանքով ավելի քան 100 մարդ է մահացել, ավելի քան 4 հազարը` տուժել: Մահացածների թվում նաև 6 հայ կա, ևս հարյուր հայեր վնասվածքներ են ստացել։
Լիբանանի վարչապետ Հասան Դիաբը կարգադրել է հետաքննել պայթյունի պատճառներն ու 48 ժամվա ընթացքում պատասխանատվության ենթարկել մեղավորներին։ Նախնական տեղեկություններով` պայթյունի պատճառը նավահանգստի պահեստներում պահվող 2700 տոննա ամոնիումի սելիտրան է եղել։
Բեյրութում սուգ է հայտարարվել:
Արմեն Սարգսյանը խոսել է Արամ Ա–ի հետ ու աջակցելու պատրաստակամություն հայտնել