ԵՐԵՎԱՆ, 1 օգոստոսի – Sputnik. Օգոստոսի 1 - ին դադարել է գործել Վրաստանի տարածքում օտարերկրացիների և քաղաքացիություն չունեցող անձանց օրինական կացության արտոնյալ ռեժիմը, որը երկարացվել էր կորոնավիրուսի պատճառով։ Տեղեկությունը հաղորդում Է Sputnik Գրուզիան:
Կառավարությունը դեռ չի հայտարարել այդ ռեժիմը հետագայում երկարաձգելու մասին։
Խոսքն այն օտարերկրացիների մասին է, որոնք մինչեւ 2020 թվականի մարտի 14-ը օրինական կարգով գտնվել են Վրաստանում և չեն կարողացել լքել երկիրը կորոնավիրուսի համավարակի պատճառով:
Այդ ժամանակ Վրաստանի իշխանությունները թույլ են տվել նրանց մնալ երկրում մինչև հուլիսի 31-ը` անկախ վիզայի կամ կացության թույլտվության ժամկետը լրանալուց:
Եթե կառավարությունը չերկարաձգի իր որոշման գործողության ժամկետը, օգոստոսի 1-ից այն օտարերկրացիները, որոնց փաստաթղթերով Վրաստանում գտնվելու ժամկետներն անցել են, պետք է տուգանք վճարեն երկրից դուրս գալու դեպքում:
Կորոնավիրուսի տարածման պատճառով մարտի 21-ին ամբողջ Վրաստանի տարածքում հայտարարվել էր արտակարգ դրություն մեկ ամիս ժամկետով: Երկիրն ամբողջությամբ դադարեցրել Է ավիահաղորդակցությունը և փակել է սահմանները օտարերկրացիների համար։
Արտակարգ դրության ռեժիմը Վրաստանում դադարել է գործել դեռ մայիսի 23-ին, սակայն երկրի սահմանները փակ են մնում, իսկ կանոնավոր միջազգային ավիաչվերթերի վերսկսումը հետաձգվել է մինչև օգոստոսի սկիզբ:
Մինչդեռ շատ երկրներ չարտերային չվերթեր են կազմակերպել իրենց քաղաքացիներին հայրենիք վերադարձնելու համար։ Բացի այդ, շատ երկրներ իրենց քաղաքացիներին դուրս են բերել ցամաքային սահմանով։
Վրաստանը պատրաստվում է բացել սահմանները, բայց ոչ բոլորի համար. Հայաստանից մարդ կընդունե՞ն