ԵՐԵՎԱՆ, 31 հուլիսի – Sputnik. ԱԱԾ նախկին տնօրեն Արթուր Վանեցյանին ԱԱԾ կանչելը քաղաքական հետապնդում է։ Նրա պաշտպան Լուսինե Սահակյանն այսպես որակեց այսօր Վանեցյանին ԱԱԾ հրավիրելն ու բացատրություն պահանջելը։
Նշենք, որ Վանեցյանը, ճիշտ է, ներկայացել է ԱԱԾ, բայց հրաժարվել է բացատրություն տալ։
«Պարզապես ուզում են քրեական գործ հարուցել և մեղադրանք առաջադրեն Վանեցյանին։ Սա քաղաքական հետապնդում է և որևէ այլ դիրքորոշում ոչ մի տրամաբանող մարդ չի կարող ունենալ»,–ասաց Սահակյանը։
Նրա խոսքով` եթե օրենքն այնքան ծաղրեն, որ քրեական գործ հարուցվի, ապա չի բացառվում, որ Վանեցյանին նորից կկանչեն ԱԱԾ։ Պաշտպանը նշեց` արդեն ոչնչի վրա չի զարմանում։
Վանեցյանին ԱԱԾ էին կանչել 2018-ին եղած մի դեպքի առնչությամբ, երբ աշխատանքի է վերականգնվել մեկը, որը, ըստ ԱԱԾ–ի, չպետք է վերականգներ։ Թե ինչ աշխատակցի մասին է խոսքը, Սահակյանն ասաց, որ չի կարող շատ բան ասել, սակայն այդ աշխատակցի վերականգնման արդյունքում շատ լուրջ գումարներ են վերականգնվել։
Հիշեցնենք` Վանեցյանը քիչ առաջ հայտնել էր, որ այսօր իրեն ԱԱԾ էին հրավիրել «անհեթեթ» գործի շրջանակում, որով նա որևէ կարգավիճակ չունի։ Նրա խոսքով` քրեական գործ հարուցված չէ` նյութերի նախապատրաստման փուլում են իրեն հրավիրել ԱԱԾ։