ԵՐԵՎԱՆ, 31 հուլիսի — Sputnik. «Սասնա Ծռեր» կուսակցության ղեկավար Ժիրայր Սեֆիլյանի կողմից դատավոր Մեսրոպ Մակյանին առերևույթ զրպարտելու դեպքի առթիվ հարուցվել է քրեական գործ։ Հայտնում են ՀՀ քննչական կոմիտեի լրատվական բաժնից։
Նշենք, որ 2020թ. հունիսի 8-ին ՀՀ ոստիկանության կենտրոնական բաժին էր ստացվել 168.am կայքում տեղադրված «Մեսրոպ Մակյանին և նրա նմաններին տեղեկացնում եմ, որ խստագույնս պատժվելու են իրենց կատարած հանցագործությունների համար. Ժիրայր Սեֆիլյան» վերտառությամբ հոդվածը, որտեղ Ժիրայր Սեֆիլյանը գրել էր, որ դատավոր Մեսրոպ Մակյանը որոշում էր կայացրել հաջորդ նիստին բերման ենթարկել «Սասնա Ծռերի» 6 մասնակիցներին՝ անհարգալից խոսելով դատարանի մասին:
«Դեպքի առթիվ ՀՀ ոստիկանության Կենտրոնական բաժնում հարուցվել է քրեական գործ՝ ՀՀ քրեական օրենսգրքի 344-րդ հոդվածի (դատավորին, դատախազին, քննիչին, հետաքննություն կատարող անձին կամ հարկադիր կատարողին զրպարտելը) 2-րդ մասի հատկանիշներով»,–նշված է հաղորդագրության մեջ։
Քրեական գործով որոշում է կայացվել դատավոր Մեսրոպ Մակյանին տուժող ճանաչելու մասին: Ժիրայր Սեֆիլյանը հրավիրվել է հարցաքննության: Նախաքննությունը շարունակվում է:
Սեֆիլյանին քաղաքացիություն շնորհվեց. մնաց նախագահի ստորագրությունը