ԵՐԵՎԱՆ, 30 հուլիսի – Sputnik. ԱԺ նախկին պատգամավոր Ռուբեն Հայրապետյանին նկատմամբ հետախուզումը դադարեցվել է։ Տեղեկությունը hraparak.am–ին է հայտնել նրա պաշտպան Ամրամ Մակինյանը։
Վերջինիս խոսքով՝ նման որոշում է կայացրել Ռուսաստանի Դաշնությունը։
«Հայրապետյանը ՌԴ-ում ապրում է իքս հասցեում, անտրամաբանական է հետախուզումը մի մարդու նկատմամբ, որի գտնվելու վայրը բոլորի համար պարզ է»,–ասել է նա։
Հարցին, թե Հայրապետյանը ՌԴ քաղաքացի է, Մակինյանը պատասխանել է` տեղեկություն չունի։
ՀՀ գլխավոր դատախազի խորհրդական Գոռ Աբրահամյանը Sputnik Արմենիայի հետ զրույցում ասաց, որ նախնական տվյալներ ունեն, որ Ռուսաստանը դադարեցրել է հետախուզումը Հայրապետյանի նկատմամբ։
«Այժմ տվյալները ստուգման փուլում են։ Ինչպես հետախուզումը դադարեցնելու հավանականության, այնպես էլ դրա հաստատման դեպքում հիմքերի վերաբերյալ ՌԴ գլխավոր դատախազություն հարցում ենք ուղարկել և սպասում ենք պատասխանի»,–ասաց Աբրահամյանը։
Հարցին, թե դատախազությանը հայտնի է Հայրապետյանի գտնվելու վայրը, ինչպես նշել է վերջնիս պաշտպանը, Աբրահամյանը պատասխանեց` դատախազությունը պատշաճ իրավական գործընթացներ իրականացնելու համար (խոսքը հանձնման գործընթացի մասին է) հիմնվում է այլ երկրների իրավապահ մարմինների կողմից տրված տեղեկատվության վրա։ Սակայն ՀՀ դատախազությունը չունի որևէ տվյալ այլ երկրների կողմից Հայրապետյանի հայտնաբերման վերաբերյալ, որի պարագայում կարող էին հանձնման միջնորդություն ներկայացնել։
Աբրահամյանը հավելեց` Հայրապետյանի գտնվելու վայրը հայտնի լինելը չէր կարող հիմք հանդիսանալ, որ նրա նկատմամբ հետախուզումը դադարեցվի։ Նրա խոսքով` եթե իրոք դադարեցվել է Հայրապետյանի նկատմամբ հետախուզումը, ապա դրա համար օրենքով նախատեսված այլ հիմքեր պետք է լինեն։
Նշենք, որ Ռուբեն Հայրապետյանը որպես մեղադրյալ է ներգրավել ՀՀ քրեական օրենսգրքի 119-րդ հոդվածի 2-րդ մասի 3-րդ, 5-րդ կետով (ֆիզիկական ուժեղ ցավ կամ հոգեկան տառապանք պատճառելը), 133-րդ հոդվածի 2-րդ մասի 1-ին, 2-րդ, 7-րդ կետերով (մի խումբ անձանց կողմից շահադիտական դրդումներով մարդուն առևանգելը) և 322-րդ հոդվածի 2-րդ մասով (ինքնիրավչություն):
Քաղաքապետարանի աշխատակիցը Ռուբեն Հայրապետյանի ծանոթներին «ջրի գնով» հող է վաճառել
Նրան մեղադրանք է առաջադրվել «Հարսնաքար» համալիրի գործադիր մարմնի ղեկավարի նկատմամբ առերևույթ կատարված ինքնիրավչության, նրան ազատությունից ապօրինի զրկելու, ֆիզիկական ուժեղ ցավ, հոգեկան ուժեղ տառապանք պատճառելու դեպքերի առթիվ քննվող քրեական գործով: Հայրապետյանը հետախուզման մեջ է։
Նույն մեղադրանքները ներկայացվել են նրա որդուն՝ Ռաֆիկ Հայրապետյանին, որին կալանավորելու միջնորդությունը մերժվել է, նա ազատության մեջ է։
«Հարսնաքարի» գործով հետախուզվողներից մեկը հայտնաբերվել ու կալանավորվել է