ԵՐԵՎԱՆ, 30 հուլիսի – Sputnik. Այսօր ՀՀ կառավարության շենքի դիմաց էին հավաքվել «Լիդիան Արմենիայի» նախկին աշխատողներն ու Ամուլսարի հարակից համայնքների բնակիչները։ Նրանք բողոքի ակցիա էին իրականացնում` պահանջելով միջոցներ ձեռնարկել Ամուլսարի հարցը լուծելու ուղղությամբ։
«Լիդիանի» նախկին աշխատակիցներից մեկը՝ Վիրաբ Հովհաննիսյանը, որը ցուցարարների մեջ ամենաակտիվն էր, հիշեցրեց, որ վարչապետ Նիկոլ Փաշինյանը ժամանակին հորդորել էր ճանապարհները բացել։
«Բայց հորդորելով ոչ ոք ճանապարհ չի բացի: Էդ մարդիկ, որ փակել են ճանապարհը, 2 տարի ոչ մի տեղ չեն աշխատում, բայց ապրում են: Ես տարբեր աշխատանքներ եմ անում, չեմ կարողանում ծախսերս հասցնեմ, էդ մարդիկ 2 տարի ինչո՞վ են ապրում: 20 հոգով չպետք է որոշեն, թե Գնդևազի բնակիչների 80 տոկոսի կյանքը ինչպես պետք է լինի»,–ասաց ցուցարարը:
Ցույցի ողջ ընթացքում ոստիկանները հորդորում էին ցուցարարներին լքել տարածքը, քանի որ արտակարգ դրության ժամանակ ցույցերն արգելված են։
Բողոքի ակցիայի մասնակիցները ոստիկանների հետ համաձայնության եկան, որ ընթերցեն վարչապետին ուղղված իրենց դիմումն ու հեռանան:
Վիրաբ Հովհաննիսյանը բոլոր աշխատակիցների անունից բարձրաձայն կարդաց հորդորը։
«Մեծարգո վարչապետ, կառավարության հարգելի անդամներ, մենք ներկայացնում ենք Ամուլսարի շրջակա համայնքների բնակիչների մեծամասնությունը: Դեռևս 2 ամիս առաջ մենք 1200 բնակչի ստորագրությամբ նամակ ենք հանձնել կառավարությանը, սակայն որևէ պատասխան չստանալով` հուլիսի 22-ին բաց նամակ հղեցինք, որը տարածվեց լրատվամիջոցներում: Դատելով ձեր լռությունից՝ տպավորություն է ստեղծվում, թե դուք մոռացել եք, որ Ամուլսարն ու շրջակա բնակավայրերը գտնվում են ՀՀ տարածքում և դուք բարձրաձայնված խնդիրները համարում եք օտար պետության և օտար ժողովրդի ներքին հարց։ Դուք ստանձնել եք պարտավորություն, որ կլուծեք մեր խնդիրները և կապահովեք իրավական և սոցիալական պաշտպանվածություն»,–նշեց ցուցարարը:
Նրանց խոսքով` իրենք չեն զգում, որ պետությունը ցանկանում է արդարացի և օրինական ճանապարհով լուծել իրենց խնդիրները, ավելին` իրենք կասկածներ ունեն, որ կառավարությունն իրենց զոհաբերում է, ոմանց տնտեսական և սոցիալական շահերի համար։
«Պահանջում ենք Ամուլսարի շուրջն ապրող մարդկանց ապահովել արժանապատիվ աշխատանքով, պահանջում ենք Ամուլսարի խնդիրը զերծ պահել քաղաքական շահարկումներից և հարցը լուծել բացառապես իրավական դաշտում: Պահանջում ենք կառավարությանը միջոցներ ձեռնարկել և անհապաղ բացել մի քանի տասնյակ մարդկանց կողմից արդեն 2 տարի շրջափակված հանքի ճանապարհները և թույլ տալ շահագործել հանքը, պահանջում ենք հանքի ճանապարհներն անօրինական ձևով փակած մարդկանց կարծիքը չընդունել որպես համայնքի տեսակետ։ Մենք կանք, գոյություն ունենք ու մնացել ենք առանց աշխատանքի»,– ասաց Վիրաբյանը։
Ակցիայի մասնակիցները վստահ են, որ Ամուլսարի հանքի շահագործման նախագիծը բնապահպանական առումով լավագույնն է Հայաստանում և չափորոշիչներով գերազանցում է բոլոր հանքերին:
Հիշեցնենք, որ Ջերմուկի բնակիչները դեռևս նախորդ տարվանից պարբերաբար փակում են Ամուլսար տանող ճանապարհները: Նրանք կարծում են, որ հանքի շահագործումը մեծ վնաս կհասցնի շրջակա միջավայրին: 2018 թվականի հունիսից մի խումբ մարդիկ` «Ամուլսարի պահապանները», գիշեր-ցերեկ հերթապահում են՝ փակ պահելով դեպի հանք տանող ճանապարհները։
ՀՀ վարչապետ Նիկոլ Փաշինյանը 2018 թ–ի սեպտեմբերի 9–ին Facebook–յան ուղիղ եթերում անդրադարձել էր Ամուլսարի հանքի շահագործման թեմային` ասելով, որ Ջերմուկի բնակիչները պետք է ապաշրջափակեն Ամուլսարի հանք տանող ճանապարհները:
«Այս պահին Ամուլսարի շահագործումն արգելելու դե յուրե հիմք չկա». Փաշինյան
Ավելի վաղ լիբանանյան «Էլարդ» ընկերությունն Ամուլսարի հանքի շահագործման ընթացքում իրականացրել էր շրջակա միջավայրի ռիսկերի գնահատում: Ընկերության ներկայացուցիչները ուսումնասիրել էին դեռևս 2016 թ.-ին «Լիդիան Արմենիա» ընկերության պատրաստած` շրջակա միջավայրի վրա ազդեցության գնահատումը և հայտարարել հնարավոր ռիսկերի մասին: Միևնույն ժամանակ Հայաստանի քննչական կոմիտեի ներկայացուցիչները նշել են, որ ռիսկերը կառավարելի են:
Ամուլսարի ոսկու հանքը Հայաստանի երկրորդ խոշոր հանքավայրն է: Այն ղեկավարում է «Լիդիան Արմենիա» ՓԲԸ-ն, որը միջազգային «Lydian international» ընկերության դուստր ձեռնարկությունն է:
Ամուլսարի քրգործով նոր տվյալներ են ի հայտ եկել. Արսեն Այվազյան