ԵՐԵՎԱՆ, 29 հուլիսի — Sputnik. ՀՀ–ում աղբահանության ծառայությունների որակի բարձրացման համար շարունակվում են տեխնիկական սարքավորումներով համալրման աշխատանքները. արդեն իսկ ձեռք է բերվել 59 տեխնիկա, 600 աղբաման: Այս մասին զեկուցվել է ՀՀ վարչապետ Նիկոլ Փաշինյանին` աղբահանության համակարգի ռազմավարության թեմայով նրա գլխավորութամբ այսօր տեղի ունեցած խորհրդակցության ժամանակ։
«Ռազմավարությամբ մշակվել է երկամյա միջոցառումների ծրագիր։ Նախատեսվող աշխատանքները միտված են լինելու հանրապետությունում աղբահանության ծառայությունների որակի բարձրացմանը, էկոլոգիական պայմանների ապահովմանը, աղբի վերամշակման մեխանիզմների ներդրմանը և այլն»,–նշված է հաղորդագրության մեջ:
Ռազմավարությամբ նախատեսվում է համայնքների համար գծագրել աղբահանության կոնկրետ սխեմաներ։ Մասնավորապես, բնակավայրերում կհիմնվեն աղբի հավաքման կետեր, իսկ շինարարարական աղբի համար կսահմանվեն առանձին ընթացակարգեր:
Փաշինյանը կարևորել է հանգստի վայրերում, գետերի ափամերձ տարածքներում աղբահանության կազմակերպման հարցը և այդ առնչությամբ տվել համապատասխան հանձնարարականներ:
Հիշեցնենք, որ միջազգային գործընկերների հետ համագործակցությամբ կիրականացվեն 2 խոշոր նոր աղբավայրերի կառուցման աշխատանքներ՝ Երևանում և Հրազդանում: Դրանց շինարարությունը կմեկնարկի առաջիկայում: