ԵՐԵՎԱՆ, 26 հուլիսի - Sputnik. 168 ռուսաստանցիներ կարողացել են հայրենիք վերադառնալ։ Հայաստանում Ռուսաստանի դեսպանությունը Facebook-ի պաշտոնական էջում տեղեկացնում է, որ քաղաքացիները տուն են վերադարձել այսօր` «Ուրալյան ավիաուղիներ» ավիաընկերության իրականացրած Երևան-Ժուկովսկի չվերթով:
Նշվում է, որ չվերթը տեղի է ունեցել ՌԴ քաղաքացիներին հայրենիք վերադարձնելու աշխատանքների շրջանակում։
Աշխատանքներն իրականացվում են Հայաստանում Ռուսաստանի դեսպանատան կողմից՝ ՌԴ մի շարք նախարարությունների և գերատեսչությունների հետ սերտ համագործակցությամբ և ՌԴ կառավարությանն առընթեր օպերատիվ շտաբի գլխավորությամբ:
«Ռուսաստանցիներին հայրենիք վերադարձնելու աշխատանքները շարունակվում են»,- ասված է հաղորդագրության մեջ։
Նշենք, որ Ռուսաստանը կորոնավիրուսի համավարակի պատճառով մարտի վերջից դադարեցրել է այլ երկրների հետ կանոնավոր եւ չարտերային ավիահաղորդակցությունը՝ որոշակի բացառություններով։
Սակայն այս ամիսներին պարբերաբար կազմակերպվել են ռուսաստանցիների տարհանման հատուկ չվերթերը:
Հավելենք, որ հայաստանյան գերատեսչությունների հետ համալիր համագործակցության արդյունքում Հայաստանից Ռուսաստան է մեկնել 2990 քաղաքացի։
Չարտերային չվերթ Երևանից` ՌԴ քաղաքացիների համար. ովքեր կարող են անվճար մեկնել