ԵՐԵՎԱՆ, 26 հուլիսի - Sputnik. Ucom–ը կարգավորում է Երևանի կենտրոնում ինտերնետ կապի խնդիրները։ Ինչպես Sputnik Արմենիային հայտնել են ընկերության մամուլի ծառայությունից, Ucom–ը սկսել է արդիականացնել ինտերնետի ցանցը՝ կապի որակը բարելավելու նպատակով:
Աշխատանքները կազմակերպվում են այնպես, որ բաժանորդները հնարավորինս քիչ անհարմարություն զգան, այդ պատճառով էլ աշխատանքները հիմնականում ընթանում են գիշերային ժամերին: Ընկերությունից հաղորդում են, որ օրվա ընթացքում կապի խափանումները զգացվել են միայն առանձին կետերում ՝ հիմնականում Երևանի կենտրոնում։
Հեռախոսային կապի հետ կապված խնդիրներ չեն եղել։
Նշենք՝ ավելի վաղ Ucom–ը բազմիցս նշել էր, որ անձնակազմի մի մասի՝ «Team» ընկերություն տեղափոխվելու պատճառով իրենք կապի և աշխատանքի հետ կապված խնդիրներ չունեն։
Ucom-ը բացահայտել է Beeline-ի գնման գաղտնիքները. ի՞նչ են պայմանավորվել Եսայանները
Հիշեցնենք՝ ապրիլին լուրեր տարածվեցին, որ Ucom-ի շուրջ 800 աշխատակիցներ աշխատանքից դուրս գալու դիմումներ են գրել:
Ապրիլի 14-ին ընկերության հիմնադիրներ և 5,94%-ի բաժնետերեր Եսայան եղբայրները հայտարարեցին, որ մյուս սեփականատերերին ավելի քան 34 մլրդ դրամ են առաջարկել մնացած բաժնետոմսերը ձեռք բերելու համար, որպեսզի կարողանան որոշիչ ձայն ունենալ բաժնետերերի որոշումներում:
Ապրիլի 15-ին, սակայն, հայտարարվեց, որ ընկերության տնօրենների խորհրդի նիստում ընկերության գլխավոր տնօրեն է նշանակվել Արա Սերգեյի Խաչատրյանը։ Եսայան եղբայրները լքեցին Ucom-ը և հիմնադրեցին նոր՝ Team ընկերությունը։
«Իմ առջև պահանջ է դրվել ոչ շահավետ առաջարկով օտարել Ucom-ը»․ Գուրգեն Խաչատրյան
Հունիսի 8-ին «ՎԵՈՆ» ընկերության կենտրոնակայանը տեղեկություն էր տարածել, որ Ucom ընկերության նախկին մենեջերներ Հայկ և Ալեքսանդր Եսայան եղբայրները բանակցություններ են վարում «Վեոն Արմենիա» (Beeline ապրանքանիշ) ընկերությունը գնելու համար։