ԵՐԵՎԱՆ, 23 հուլիսի –Sputnik. ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ ասել է, որ հրադադարի ռեժիմի խախտումների դեպքերը նվազել են, սակայն լարվածությունը Հայաստանի և Ադրբեջանի սահմանին պահպանվում է։
«Հետագա էսկալացիան կանխելու նպատակով մենք կոնկրետ քայլեր ենք ձեռնարկում ԵԱՀԿ ՄԽ շրջանակում որպես համանախագահ և գործում ենք ինքնուրույն», – ասել է Զախարովան։
Հակամարտության գոտում տիրող իրավիճակն անցած շաբաթ քննարկվել է Մինսկի խմբում, այնուհետև ԵԱՀԿ մշտական խորհրդում։ ԵԱՀԿ ՄԽ համանախագահները մշտական կապի մեջ են կողմերի հետ, ավելի վաղ հեռահար հանդիպումներ են անցկացվել կազմակերպության գլխավոր քարտուղարի հետ։
Քննարկումներ են նախատեսվում ՄԱԿ–ի քարտուղարության հետ։ Զսպվածություն դրսևորելու, հրադադարի ռեժիմը խստորեն պահպանելու կոչեր են հնչել, այդ թվում` ՌԴ նախագահի վարչակազմի և ԱԳՆ–ի մակարդակով։
«Սերգեյ Լավրովը զրուցել է հայ և ադրբեջանցի գործընկերների հետ։ Այս շաբաթ նա իրավիճակը քննարկել է Մոսկվայում Ադրբեջանի և Հայաստանի դեսպանների հետ։ Փոխգործակցություն է իրականացվում ռազմական գերատեսչությունների մակարդակով», – ասել է Զախարովան։
Ըստ նրա` Երևանն ու Բաքուն հրադադարի ամրապնդմանը և բանակցային գործընթացի ակտիվացմանն ուղղված տարբեր նախաձեռնություններով են հանդես գալիս։
Մոսկվայում հուսով են, որ միջազգային ուղևորությունների սահմանափակումների չեղարկումից հետո հակամարտության կարգավորման հետ կապված համալիր հարցերի առարկայական մշակման հնարավորություն կլինի։
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 23-ի պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 5 զոհ ունի, 36 վիրավոր (ևս մեկը խաղաղ բնակչությունից)։