ԵՐԵՎԱՆ, 21 հուլիսի — Sputnik. ՀՀ վարչապետ Նիկոլ Փաշինյանը լավ լուր է հայտնել` Հայաստանում կորոնավիրուսի դեմ պայքարի արդյունքում դրական տեղաշարժ կա։
«Կորոնավիրուսի դեմ պայքարում շատ փոքր դրական շարժ ունենք: Սա սակայն չի նշանակում, որ պիտի թուլացնենք մեր զգոնությունը. ընդհակառակը` հակահամաճարակային կանոնների պահպանման մեր գործողությունները պիտի դառնան ավելի հետևողական` վիրուսի տարածման ուժգնությունը կոտրելու համար»,– Facebook սոցցանցի իր էջում գրել է Փաշինյանը։
Նա հորդորում է, որ մարդիկ շարունակեն հետևել հակահամաճարակային կանոններին` դնեն դիմակներ, պահպանեն սոցիալական հեռավորություն և պարբերաբար ախտահանեն ձեռքերը:
Ըստ Փաշինյանի` միայն դրա շնորհիվ կկարողանանք էականորեն նվազեցնել նոր դեպքերը:
Վարչապետը նաև տեսանյութ է հրապարակել գրառմանը կից, որտեղ ասվում է, որ թե ինչքան ծանրաբեռնված են աշխատում ԲԿ–ներն այս օրերին։ Մասնավորապես, Գյումրու ԲԿ–ի աշխատանքի մասին է խոսք գնում, որտեղ նաև պացիենտներն են պատմում, որ, օրինակ, չէին հավատում վարակին այնքան ժամանակ, մինչև իրենց էլ այն «բաժին չհասավ»։
Վերջիններս նույնպես հորդորում են դիմակ դնել։
Հիշեցնենք, որ վերջին մեկ օրում Հայաստանում գրանցվել է կորոնավիրուսի հաստատման 273 նոր դեպք, ինչը վատ արդյունք չէ նախորդ` 500-600–ի շրջանակներում արձանագրվող տվյալի համեմատ։
Մարտի 16–ից Հայաստանում արտակարգ դրություն է, որն արդեն մի քանի անգամ երկարաձգվել է։ Հուլիսի 13-ին կառավարությունը որոշեց արտակարգ դրության ռեժիմը երկարացնել մինչև օգոստոսի 12-ը։
Կայուն, բայց ծանր. Թորոսյանը խոսեց Հայաստանում կորոնավիրուսային իրավիճակից