ԵՐԵՎԱՆ, 16 հուլիսի – Sputnik. ՀՀ Տավուշի մարզում ադրբեջանական ԶՈւ-ի գիշերային հրետակոծության հետևանքով Այգեպար, Ներքին Կարմիրաղբյուր, Չինարի, Մովսես, Տավուշ գյուղերում ու Բերդ քաղաքում վնասվել են տասից ավելի բնակելի տներ, ենթակառուցվածքներ: Այսօր Տավուշի մարզում կայացած ճեպազրույցում տեղեկությունը հայտնեց Տավուշի մարզպետ Հայկ Չոբանյանը:
«Առանձնապես ուզում եմ նշել Այգեպար գյուղի մանկապարտեզի ռմբահարումը,- ասաց նա,- վնասվել է ջրագիծ Ներքին Կարմիրաղբյուր գյուղի հատվածում, որի վերականգնման աշխատանքներն ընթացքի մեջ են»:
Մարզում հայտարարված է ներքին մոբիլիզացիա՝ պատսպարման առումով, իսկ հրետակոծության ընթացքում բնակչությունը հիմնականում գտնվել է ապաստարաններում ու նկուղներում:
«Բարեբախտաբար, քաղաքացիական բնակչության մեջ վիրավորներ ու զոհեր չունենք»,- ասաց մարզպետը՝ շնորհակալություն հայտնելով մարզի բնակչությանը՝ միասնական գործելու համար և բոլոր կառույցների աշխատակիցներին, որոնք մասնակցել են քաղպաշտպանության իրականացմանը:
Մարզում ստեղծվել է հրետակոծված շինությունների գնահատման ու գույքագրման հանձնաժողով, որն ամեն օր զբաղվելու է քաղաքացիների կրած վնասների հաշվառմամբ ու գնահատմամբ:
«Վաղվանից մենք սկսելու ենք վնասված տների վերակառուցման աշխատանքները, իսկ այն տների փոխարեն, որոնց վերականգնումը հնարավոր չի լինի, կկառուցվեն նորերը: Ես ուզում եմ, որ մեր բնակիչները, որոնց բնակարանները վնասվել են, անհոգ լինեն ու վստահ, որ մենք ամենասեղմ հարցերում լուծելու ենք իրենց բնակարանային ապահովման հարցերը:
Մարզպետը հայտարարեց, որ թեև համայնքներում խուճապ չկա, բայց բնակչությունը պետք է հնարավորինս մնա պատսպարված և պատրաստ լինի իրավիճակի ցանկացած փոփոխության՝ ցանկացած ուղղությամբ:
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 15-ի պաշտոնական տվյալներով՝ Ադրբեջանն ունի 11 զոհ, իսկ հայկական կողմը` 4 զոհ, 10 վիրավոր։
Հուլիսի 16–ի առավոտյան ՊՆ–ն հայտնեց, որ գիշերը՝ ժամը 03:40-ի սահմանում, ՀՀ ԶՈւ դիրքապահները հակառակորդի շարժ են նկատել։ Անցնելով շրջանաձև պաշտպանության՝ հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները ժամը 05:20-ին սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Պաշտպանության նախարար Դավիթ Տոնոյանը կապ է հաստատել ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշչիկի հետ։ Նա ներկայացրել է ժամը 03:40-ից ՀՀ պետական սահմանին ստեղծված իրավիճակը, նշել, որ ադրբեջանական կողմն ունի բազմաթիվ վիրավորներ և զոհեր։