ԵՐԵՎԱՆ, 15 հուլիսի – Sputnik. Moderna ընկերությունը, որի համահիմնադիրն ու գլխավոր տնօրենը հայազգի գիտնական, գործարար և բարերար Նուբար Աֆեյանն է, ավարտել է COVID-19 համավարակի դեմ պատվաստանյութի կլինիկական փորձարկման 1-ին փուլը: Տեղեկությւոնը հայտնում է NBC հեռուստաալիքը:
Փորձարկումն արվել է 18-ից 55 տարեկան 45 առողջ մեծահասակների վրա, որոնք 28 օր ընդմիջումով երկու պատվաստում են ստացել։ Փորձարկման մասնակիցները բաժանված են եղել 3 խմբի, որոնցից առաջինն ստացել է 25-ական մգ, երկրորդը՝ 100, երրորդը՝ 250-ական մգ չափաբաժիններով պատվաստանյութ:
Փորձարկումների բոլոր մասնակիցների մոտ COVID-19-ի հակամարմինների սինթեզ է խթանվել, և փորձարկման 67-րդ օրը նրանց մոտ հակամարմինների քանակը 2-4 անգամ գերազանցել է հիվանդությունը բնական ճանապարհով հաղթահարածների մոտ առաջացած հակամարմինների քանակը:
Փորձարկման արդյունքում խնդիրներ կամ լուրջ ազդեցություն չի նկատվել:
Մասնակիցների մեծ մասի մոտ առաջացած կողմնակի ազդեցությունները եղել են հոգնածությունը, դողը, գլխացավը, մկանային ցավը և ցավը ներարկման հատվածում։
Կորոնավիրուսի դեմ պայքարում Ռուսաստանն առաջընթաց է գրանցում. Պուտին
Ոչ ցանկալի դրսևորումներն ի հայտ են եկել երկրորդ պատվաստումից հետո, հատկապես բարձր չափաբաժնով ներարկման դեպքում։
250 մկգ պատվաստանյութ ստացած խմբի 3 մասնակից (21%) հայտնել է մեկ կամ մի քանի ծանր կողմնակի ազդեցության մասին։
Պատվաստանյութի փորձարկումները շարունակվում են։
Հիշեցնենք՝ ՀՀ առողջապահության նախարար Արսեն Թորոսյանը հայտնել էր, որ Հայաստանը բանակցություններ է վարում կորոնավիրուսի դեմ պատվաստանյութ արտադրող որոշ ընկերությունների, այդ թվում՝ Նուբար Աֆեյանի Moderna ընկերության հետ։
Նախարարը հայտնել էր, որ Հայաստանը պետք է նախապես պայմանավորվի պոտենցիալ արտադրողի հետ՝ պատվաստանյութը շուկայում հայտնվելուց անմիջապես հետո այն ձեռք բերելու ուղղությամբ:
Գնումների հարցում ՀՀ կառավարությունը բանակցում է նաև ՄԱԿ-ի ու ԱՀԿ-ի համապատասխան գրասենյակների հետ:
Կայուն, բայց ծանր. Թորոսյանը խոսեց Հայաստանում կորոնավիրուսային իրավիճակից