ԵՐԵՎԱՆ, 15 հուլիսի – Sputnik. Հայկական կողմը պետք է ամեն ինչ անի, որ դիրքային և բանակի կառավարելիության հաջողությունները զարգացվեն։ Ազգային ժողովում լրագրողների հետ ճեպազրույցում նման կարծիք հայտնեց ԱԺ «Իմ քայլը» խմբակցության պատգամավոր, Պաշտպանության և անվտանգության հարցերի հանձնաժողովի նախագահ Անդրանիկ Քոչարյանը՝ անդրադառնալով Տավուշում ընթացող մարտական գործողություններին։
«Այսօր սահմանին տիրող հարաբերական անդորրը պայմանավորված է նրանով, որ հակառակորդը նկատեց՝ իր գործիքակազմի` նման կիրառումն էֆեկտիվ չէ։ Ապրիլյան պատերազմից հետո հայկական ԶՈւ-ն վերադասավորել է իր խնդիրները և այսօր ավելի բարձր մակարդակի վրա է»,-ասաց Քոչարյանը։
Նրա խոսքով՝ ակնհայտ է, որ Ադրբեջանը միշտ ցանկություն է ունեցել ստատուս քվոյի փոփոխության հասնելու, սակայն այս անգամ ևս գործողությունները նպատակին չհասան: Ըստ Քոչարյանի՝ Ադրբեջանն անում է քայլեր, որոնք մինչև վերջ հաշվարկված չեն։
Անդրադառնալով սահմանին ընթացող մարտերին միջազգային հանրության արձագանքին՝ Քոչարյանը նշեց, որ այն գրեթե միշտ նույն կերպ է դրսևորվում՝ հանդարտության և զինադադարի պահպանման կոչերի տեսքով:
Քոչարյանն ասաց նաև, որ այսօրվա զինադադարը պարտադրված է հակառակարոդին, քանի որ հասկացան՝ հնարավոր չէ Հայաստանի հետ ուժի դիրքերից խոսել։ Խաղաղությունը, նրա ձևակերպմամբ, նաև պարտադրում են։
Ինչ վերաբերում է նախկին իշխանությունների՝ այս օրերին հնչող քննադատություններին, ապա Քոչարյանը նշեց, որ նրանք պարզապես չեն ուզում ակնհայտ իրողությունների հետ հաշվի նստել։
«Ի տարբերություն նախկին իշխանության պաշտոնավարման տարիների, այսօր անվտանգային համակարգում առավելություններ ունենք: Մենք դրանով պետք է ոգևորվենք, քանի որ դա Հայաստանի Հանրապետությանն է, բոլորինս է։ Չի կարելի հոգու խորքում ուրախանալ հակառակորդի հաջողություններով»,- ասաց Քոչարյանը:
Հիշեցնենք` հուլիսի 12–ից սկսած իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են կատարել:
Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Ժամը 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը` կիրառելով հրետանային կրակ, սակայն ճնշվել են հայկական կողմից և, կորուստներ տալով, հետ շպրտվել:
Ավելի ուշ հայտնի դարձավ, որ ադրբեջանական կողմը վերսկսել է Տավուշի դիրքերի ուղղությամբ հրետակոծությունը:
Հարվածային անօդաչու սարքերը կկատարելագործենք․ Հովհաննիսյան
ՀՀ ՊՆ խոսնակ Շուշան Ստեփանյանը հուլիսի 13–ի վաղ առավոտյան հայտնեց, որ երկու-երեք ժամվա դադարից հետո առավոտյան հակառակորդը վերսկսել է սադրիչ գործողությունները՝ շարունակելով հրետակոծել հայկական դիրքերը։
Պաշտոնական տվյալներով՝ Ադրբեջանն ունի 11 զոհ, իսկ հայկական կողմը` 4 զոհ և 10 վիրավոր։