ԵՐԵՎԱՆ, 14 հուլիսի – Sputnik.Հայաստանում պետական երեք ռեսուրս` ՀՀ վարչապետի (primeminister.am), կառավարության (gov.am), ինչպես նաև էլեկտրոնային կառավարման (e-gov.am) կայքերը ենթարկվել են հաքերային հարձակման։ Այս մասին Sputnik Արմենիայի թղթակցի հետ զրույցում ասաց մեդիափորձագետ, տեղեկատվական անվտանգության մասնագետ Սամվել Մարտիրոսյանը։
Ավելի վաղ Sputnik Արմենիային տված հարցազրույցում Մարտիրոսյանն ասել էր, որ կիրակի օրը հայկական դոմենով տասնյակ կայքեր DDoS հարձակման են ենթարկվել։ Փորձագետը նշել էր, որ, ամենայն հավանականությամբ, հարձակման նախաձեռնողները Ադրբեջանի հատուկ ծառայություններն են։ Սակայն, նրա խոսքով, այս հարձակումն ամենահզորը չի եղել։
Մարտիրոսյանի դիտարկմամբ` սա մեծ հարձակում է, քանի որ թիրախի տակ են հայտնվել պետական հիմնական կայքերը։
«Այդ հարցով զբաղվում է Ազգային անվտանգության ծառայությունը։ Դա նոր է սկսվել, հիմա, ըստ ամենայնի, արդեն կայքերի վերականգնման աշխատանքներ են տարվում», – ասաց Մարտիրոսյանը։
Ըստ նրա` պետական կայքերը հարձակման են ենթարկվել նաև 2012 թվականին։ ՀՀ վարչապետի կայքը վերջին անգամ հաքերային հարձակման էր ենթարկվել 2019 թվականին։ Սակայն այն ժամանակ կայքն ընդամենը մի քանի ժամ չի գործել։
Հիշեցնենք, որ հուլիսի 12–ին, ժամը 12:30-ի սահմաններում Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են կատարել:
Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Մոսկվան Երևանին ու Բաքվին զսպվածության կոչ է արել և պատրաստակամություն հայտնել միջնորդել
Ժամը 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը` կիրառելով հրետանային կրակ, սակայն ճնշվել են հայկական կողմից և, կորուստներ տալով, հետ շպրտվել: Ավելի ուշ հայտնի դարձավ, որ ադրբեջանական կողմը վերսկսել է Տավուշի դիրքերի ուղղությամբ հրետակոծությունը:
ՀՀ ՊՆ խոսնակ Շուշան Ստեփանյանը երեկ վաղ առավոտյան հայտնեց, որ երկու-երեք ժամվա դադարից հետո առավոտյան հակառակորդը վերսկսել է սադրիչ գործողությունները՝ շարունակելով հրետակոծել հայկական դիրքերի ուղղությամբ։
Ադրբեջանի պաշտպանության նախարարի տեղակալ Քերիմ Վելիևն այսօր հայտնել է, որ մարտերի հետևանքով մահացել են գեներալ-մայոր Փոլադ Հաշիմովը և գնդապետ Իլգար Միրզեևը։ ԱՊԱ գործակալությունն էլ տեղեկացրել է, որ մահացել են նաև մայոր Ահմեդով Նամիգ Խաժանօղլուն, մայոր Նովրուզով Անար Գյուլվերդիօղլուն, ենթասպա Զեյնալլա Իլգար Այազօղլուն, ենթասպա Բաբաև Յաշար Վասիֆօղլուն, գերժամանակակից ծառայության զինծառայող, զինվոր Մուստաֆազադե Էլչին Արիֆօղլուն:
ՀԱՊԿ-ը կոչ է անում անհապաղ դադարեցնել հրաձգությունը հայ-ադրբեջանական սահմանին
Հայ-ադրբեջանական պետական սահմանագոտու հյուսիսարևելյան հատվածում հակառակորդի արձակած կրակից, ցավոք, մահացու վիրավորում են ստացել զինծառայողներ մայոր Գարուշ Վեմիրի Համբարձումյանը և կապիտան Սոս Փայլակի Էլբակյանը:
Միջազգային կազմակերպություններն ու միջնորդ երկրները հանդես են եկել խաղաղության կոչով։