Դավիթ Տոնոյանը գնահատել է ռուս օդաչուների աշխատանքը

ԵՐԵՎԱՆ, 11 հուլիսի – Sputnik. ՀՀ պաշտպանության նախարար Դավիթ Տոնոյանն ընդունել է Հայաստանի Հանրապետության զինված ուժերի օդաչուական կազմի վերապատրաստման և թռիչքների անվտանգության ապահովման գործում նշանակալի ավանդ ներդրած ռուսաստանցի օդաչուներին: Տեղեկությունը հայտնում է ՀՀ պաշտպանության նախարարության մամուլի ծառայությունը։

Հաղթանակի ավիաշքերթ. ՌԴ վաստակավոր օդաչուն փորձ է իրականացնում «Էրեբունի» օդանավակայանում

6 մայիսի 2020, 23:27

Հուլիսի 10-ին կայացած հանդիպմանը ներկա են եղել ՌԴ առաջատար օդաչու-փորձարկողներ, Ռուսաստանի Դաշնության հերոս Վյաչեսլավ Յուրիի Ավերյանովն ու Եվգենի Վյաչեսլավի Ավերյանովը: Հայկական կողմից հանդիպմանը մասնակցել են ՀՀ ԶՈՒ գլխավոր շտաբի պետ, գեներալ-լեյտենանտ Օնիկ Գասպարյանը, ՀՀ ԶՈւ ավիացիայի վարչության պետ, գնդապետ Գագիկ Ասլանյանը։

Պաշտպանական գերատեսչության ղեկավարը շնորհավորել է օդաչուներին ՀՀ վարչապետի միջնորդությամբ և ՀՀ նախագահի համապատասխան հրամանագրով Հայաստանի Հանրապետության պետական պարգևի՝ Երախտագիտության մեդալի արժանանալու կապակցությամբ։

Դավիթ Տոնոյանը բարձր է գնահատել օդաչու-փորձարկողների իրականացրած աշխատանքները, համագործակցությունն ու ցուցաբերած աջակցությունը։

Օդաչու-փորձարկողներ Վյաչեսլավ և Եվգենի Ավերյանովներն իրենց հերթին ընդգծել են հայ ռազմական օդաչուների պատրաստության բարձր մակարդակը։

Հիշեցնենք՝ հուլիսի 9-ին ՀՀ նախագահ Արմեն Սարգսյանը հրամանագիր էր ստորագրել Հայաստանի Հանրապետության զինված ուժերի օդաչուական կազմի վերապատրաստման և թռիչքների անվտանգության ապահովման գործում ներդրած նշանակալի ավանդի համար առաջատար օդաչու-փորձարկող Վյաչեսլավ Յուրիի Ավերյանովին ու Եվգենի Վյաչեսլավի Ավերյանովին Երախտագիտության մեդալով պարգևատրելու մասին:

Դավիթ Տոնոյանն ընդունել է հայ ռազմական օդաչուներին վերապատրաստած ռուս մասնագետներին