Նա նշել է, որ նախագահական և խորհրդարանական ընտրություններից հետո առաջին անգամ է այցելում Արցախ և կարող է ասել, որ այն ժողովրդավարական և ազատ երկիր է և կարող է ամենաբարձր մակարդակով ընտրություններ անցկացնել։ Նա շատ օգտակար է համարել Արցախի բարձրագույն ղեկավարության հետ ունեցած հանդիպումները ՝ նշելով, որ քննարկումների առանցքում միասնականության գաղափարն էր:
«Արցախն ընտրություններից հետո միասնականության օրինակ է ցույց տալիս այն առումով, որ տարբեր քաղաքական ուժեր միավորվել են նույն կառավարության մեջ և ծառայելու են իրենց հայրենիքին, մեր հայրենիքին՝ Արցախի Հանրապետությանը Կարծում եմ՝ Արցախն ապագայի համար մեկ ընտրություն ունի, և այդ ընտրությունը հզոր պետություն լինելն ու մնալն է: Արցախի հիմնահարցն ուրիշ լուծում չունի, բացի հզոր Արցախից»,-ընդգծել է Սարգսյանը:
Ըստ նրա` հզոր Արցախը պետք է չորս հիմնական սյուների վրա հենվի: Առաջինն արցախահայության հայրենասիրությունն ու կամքն է, որն իր հետևից տանում է նաև ողջ հայությանը: Երկրորդը բանակն է: Նա կարծում է, որ Արցախն ունեցել է և այսօր էլ ունի հաղթական բանակ, և ամեն ինչ պետք է արվի, որ այդ բանակը մնա հիմնական սյուներից մեկը:
Երրորդ սյունն Արցախի տնտեսությունն է, որի առանցքը գյուղատնտեսությունն է: Նախագահի խոսքով` ինքն արցախցի գործընկերոջ հետ մանրամասն ու գործնական քննարկում է ունեցել այս հարցի շուրջ։ Եվ վերջին հենասյունը ժողովրդագրությունն է:
«Արցախը պետություն է, որը կարող է 2-3 անգամ ավելի շատ բնակչություն ունենալ, հետևաբար մի քանի անգամ ավելի մեծ տնտեսություն, հետևաբար ավելի մեծ բանակ», – ընդգծել է Սարգսյանը:
Արմեն Սարգսյանը նաև հանդիպել է Արցախի նախկին նախագահ Բակո Սահակյանի հետ: