ԵՐԵՎԱՆ, 7 հուլիսի - Sputnik. Հանրապետության նախագահ Արմեն Սարգսյանը հանդիպել է սահմանադրական բարեփոխումների մասնագիտական հանձնաժողովի մի խումբ անդամների հետ: Նախագահի մամուլի ծառայությունից հայտնում են, որ հանդիպման հենց սկզբում նախագահն ընդգծել է սահմանադրական փոփոխությունների անհրաժեշտությունն ու ողջունել վարչապետի կողմից մասնագիտական նման հանձնաժողովի ստեղծումը: Նա նշել է, որ նախագահի աշխատակազմն ու նախագահական ինստիտուտն ամենայն լրջությամբ են մոտենալու և իրենց մասնակցությունն են բերելու այս գործընթացին:
Հանրապետության նախագահը անդրադարձել է «նախագահական և խորհրդարանական կառավարման համակարգի» շուրջ քննարկումներին։ Նրա խոսքով՝ երկու դեպքում էլ կարող է լինել շատ լավ, կարող է նաև շատ վատ լինել:
«Այսօր քննարկել՝ նախագահական, թե խորհրդարանական...Սա ճանապարհից շեղման քննարկում է։ Քննարկումը պետք է լինի ըստ էության, և եթե մենք այսօր խորհրդարանական կառավարման համակարգ ունենք, ապա շատ էական է քննարկել, թե ինչպես անենք, որ այդ համակարգը մեր Սահմանադրությամբ և նրանից բխող օրենքներով լինի լավագույններից մեկը և լինի մերը։ Մենք պետք է վերցնենք աշխարհի լավագույն փորձը և այն կիրառենք՝ անպայման հաշվի առնելով մեր մշակույթը, պատմությունը, մեր այսօրվա իրականությունը։ Մենք պետք է գտնենք մերը, որը լավագույնն է»,- ասել է ՀՀ նախագահը՝ հատկապես կարևորելով հանրային քննարկումները։
Սարգսյանը վստահ է՝ Սահմանադրական փոփոխությունների վերաբերյալ հանրային քննարկումը պետք է սկսել որքան հնարավոր է շուտ, նույնիսկ մինչև այդ փաստաթուղթը իրավաբանական լեզվով ձևակերպված լինելը։
«Չպետք է լինի այնպես, որ հիմնական օրենքը գրվի, գա հասնի Ազգային ժողով, հետո նոր մտածենք հանրային քննարկման մասին»,- ասել է նախագահ Սարգսյանը։
Նախագահին հորդորում են հնարավորինս շուտ առաջադրել ՍԴ դատավորի թեկնածու
Անդրադառնալով նախագահի ընտրությանը՝ Սարգսյանը շեշտել է, որ ինքը փորձում է լինել «այն նախագահը, որը չեզոք է»։
«Բոլորդ էլ ուզում եք, որ Հանրապետության նախագահը չլինի կուսակցական, աջ կամ ձախ, վերև կամ ներքև, այլ՝ լինի մեկը, որը կկարողանա իր լիազորությունները ճիշտ իրականացնել։ Ճգնաժամային իրավիճակներում կամ անհրաժեշտության դեպքում միջնորդ լինելու համար պետք է ուղիղ մեջտեղում լինես։ Սա իրականում շատ դժվար է, և ուղիղ ընտրությունը կարող է օգնել այդ գործընթացին»,- նշել է նա։
Հանդիպման ընթացքում նախագահ Սարգսյանը կարևորել է նաև հանրաքվեի անցկացումը՝ նշելով, որ այն ուղիղ ժողովրդավարության գործիք է, և չպետք է խուսափել դա կիրառելուց։
Հանրապետության նախագահը մեկնաբանել է նաև զսպումների և հակակշիռների մեխանիզմը։ Այս համատեքստում որպես օրինակ խոսել է Սահմանադրական դատարանի դատավորի ընտրության մասին՝ նշելով, որ ներկայիս օրենսդրությամբ Հանրապետության նախագահն առաջադրում է ՍԴ դատավորի թեկնածուին, իսկ ընտրում է՝ Ազգային ժողովը: Երկու տարիների ընթացքում նախագահի կողմից առաջադրվել են թեկնածուներ, որոնք այս կամ այն պատճառով մերժվել են նախկին և ներկա Ազգային ժողովների կողմից: Ստացվում է, որ նախագահի ձայնն ունի ոչ էական նշանակություն: Որպես խնդրի լուծման հնարավոր տարբերակ նախագահ Սարգսյանն առաջարկել է, օրինակ, ՍԴ անդամներից երեքին նշանակելու լիազորություն տալ Հանրապետության նախագահին, երեքին՝ Բարձրագույն դատական խորհուրդին, երեքին էլ՝ Ազգային ժողովին:
Իշխանությունն ամեն ինչ անում է, որ ՍԴ-ում նշանակվեն իր համար ցանկալի դատավորներ. իրավագետ
Նրա կարծիքով՝ սա պարզ օրինակ է, որ ապագա նախագահներն աշխատեն այնպիսի պայմաններում, որ Սահմանադրությունը յուրաքանչյուր ինստիտուտի հնարավորություն տա լիարժեք կատարելու իր պարտականությունը։