ԵՐԵՎԱՆ, 3 հուլիսի - Sputnik. «Բարգավաճ Հայաստան» կուսակցության ղեկավարի մամուլի խոսնակ, ԲՀԿ–ական պատգամավոր Իվետա Տոնոյանը կարծում է, որ առողջապահության նախարար Արսեն Թորոսյանը գործով զբաղվելու փոխարեն` Facebook–ում մառազմատիկ ստատուսներ է շաղ տալիս։
Հայաստանում գրանցվել է կորոնավիրուսի 662 նոր դեպք. վարակվածների թիվը հասավ 27 320-ի
«Բացառիկ ցինիզմ է պետք սեփական ապիկարության ու անտաղանդության պատճառով մարդկանց ողբերգության հասցնելուց հետո ֆեյսբուքում մառազմատիկ ստատուսներ շաղ տալու համար»,– Facebook սոցցանցի իր էջում գրել է Տոնոյանը։
Նրա խոսքով` առողջապահական համակարգը խորը ճգնաժամի մեջ է, կորոնավիրուսի հիվանդացության ու մահերի ցուցանիշներն արդեն անկառավարելի տեմպեր են արձանագրում, մահացածների դիակները շփոթում ու ուրիշ ընտանիքների են տալիս, իսկ նախարարի աթոռը զբաղեցնող անձը «լկստվում է ֆեյսբուքում»։
Տոնոյանն իր գրառումն ամփոփել է նշելով. «ինչպես ասում են` no comment»։
Հիշեցնենք, որ ԲՀԿ–ական պատգամավոր Նաիրա Զոհրաբյանը հուլիսի 1-ին Facebook սոցցանցի իր էջում ահազանգել էր, որ կորել է գյումրեցի Մարիամ Մալխասյանի տատիկի՝ Սոնիկ Կարապետյանի դին, հարազատները քանի օր է` փնտրում են ու չեն գտնում։ Երեկ հայտնի դարձավ, որ դին գտել են։
Արսեն Թորոսյանը արձագանքելով Զոհրաբյանի գրառմանը՝ գրել էր, թե ինքն անձամբ տեղյակ է եղել դեպքի մասին և զբաղվում էր այդ հարցով։ Նախարարը ԲՀԿ-ական պատգամավորին կոչ էր արել վերադառնալ իրենց «մահացած» քաղաքական ուժի ռեինկառնացիային։