ԵՐԵՎԱՆ, 2 հուլիսի– Sputnik. ԱԺ «Բարգավաճ Հայաստան» խմբակցության պատգամավորը Նաիրա Զոհրաբյանը հայտնում է, որ գյումրեցի տատիկի դին գտնվել է, նրան հուղարկավորել էին Նոր Հաճնում, ու հիմա արտաշիրիմում կարվի։
«Քիչ առաջ դիահերձարանից կորած գյումրեցի տատիկի դին գտնվեց։ Ինչպես և ենթադրելի էր, անփութության հետևանքով տատիկին հանձնել էին այլ անձանց` որպես իրենց հանգուցյալ, և տատիկը հուղարկավորվել էր Նոր Հաճնի գերեզմանոցում»,– Facebook–ի իր էջում գրել է նա։
Ըստ Զոհրաբյանի` այս պահին տատիկի հարազատները ոստիկանական բաժանմունքում են, որից հետո սահմանված կարգով կիրականացվի արտաշիրիմում, և տատիկի դին կտեղափոխվի Գյումրի
«Դժվար է ասել սա այս պատմության happy end-ն, թե ոչ, բայց հանգստություն տատիկի հոգուն, և հույս ունենանք, որ մյուս տարեց կնոջ դին, որի փոխարեն հուղարկավորեցին գյումրեցի տատիկին, դեռ չեն կորցրել և կհանձնեն հարազատներին»,– նշել է պատգամավորը:
Հիշեցնենք` Նաիրա Զոհրաբյանը երեկ Facebook սոցցանցի իր էջում ահազանգել էր, որ կորել է գյումրեցի Մարիամ Մալխասյանի տատիկի դին, հարազատները քանի օր է` փնտրում են ու չեն գտնում։ Դիմել են պարետատուն, որտեղից նրանց ուղղորդել են առողջապահության նախարարություն, իսկ երբ դիմել են առողջապահության նախարարություն, նրանց հետ են ուղարկել պարետատուն: Վերջում դիմել են ոստիկանություն, սակայն առ այս պահը տատիկի դին չի գտնվել:
Նրա գրառմանն արձագանքել էր ՀՀ առողջապահության նախարարի խոսնակ Ալինա Նիկողոսյանը և նշել, որ նախարարությունը տեղյակ է եղել դեպքից: Հանգամանքները ճշտելու համար տեղեկացված է նաև ոստիկանությունը:
Եվս 10 մահ. Հայաստանում կորոնավիրուսի զոհ դարձածներից ամենաերիտասարդը 62 տարեկան կին է