ԵՐԵՎԱՆ, 29 հունիսի — Sputnik. Հայաստանի Հանրապետական կուսակցության երիտասարդները բողոքի ակցիա են իրականացնում Երևանում։ Նրանք քայլերթով գնացին ՀՀ-ում ԵՄ պատվիրակության գրասենյակի մոտ և նամակ հանձնեցին ԵՄ դեսպան Անդրեա Վիկտորինին։
ՀՀԿ երիտասարդների կարծիքով` ԵՄ դեսպանի երբեմն կողմնակալ վերաբերմունքը, երբեմն էլ լռությունը մեծ ազդեցություն է ունենում այն գործընթացների վրա, որոնք հիմա Հայաստանում տեղի են ունենում։
«Հանձնված նամակում նկարագրվում է այն ամենաթողությունը, որ տեղի է ունենում Հայաստանում Սահմանադրական դատարանի հետ»,– լրագրողների հետ զրույցում ասաց ՀՀԿ երիտասարդական թևի ղեկավար Հայկ Մամիջանյանը։
Նրա խոսքով` տիկին Անդրեա Վիկտորինին իր լռությամբ տպավորություն է ստեղծում, թե եվրոպական կառույցները կողմ են այս գործընթացներին, այնինչ թե՛ Վենետիկի հանձնաժողովը, թ՛ե ԵԺԿ–ն ՛արտահայտել են իրենց կարծիքն այս ամենաթողության նկատմամբ։
Հայկ Մամիջանյանը նշում է, որ արտակարգ դրությունը երկրում պահպանվում է մի նպատակով, որպեսզի նման ակցիաներ տեղի չունենան։ (Նշենք, որ վերջին մեկ օրվա ընթացքում Հայաստանում գրանցվել է կորոնավիրուսի 482 նոր դեպք։ Ընդհանուր վարակվածների թիվը 25127 է` խմբ.)
«Վաղ թե ուշ մեր իշխանությունների քիթը հատակին կկպնի, և նրանք կհասկանան, որ ամեն ինչ չի, որ կարող են իրենց թույլ տալ»,–ասաց նա։
Նշենք, որ ՀՀԿ շուրջ 100 երիտասարդ այսօր նամակներ են հանձնել ոչ միայն ԵՄ, այլ նաև Հայաստանում հավատարմագրված ԵԱՀԿ երկրների դեսպաններին, ՄԱԿ–ի գրասենյակին։
ՍԴ–ում դատավորների թափուր տեղերը կլրացվեն 2 ամսվա ընթացքում. ԱԺ հայտարարությունը
Հիշեցնենք` հունիսի 26–ից ուժի մեջ մտավ ԱԺ–ի ընդունած սահմանադրական փոփոխությունների նախագիծը, որով կասեցվում են 12 տարի պաշտոնավարած ՍԴ դատավորների լիազորությունները։ Նույն նախագծով ՍԴ նախագահ Հրայր Թովմասյանը նախագահից դառնում է ՍԴ դատավոր։ Շատերը նախագիծը որակում են օրենքի կոպիտ խախտում, քանի որ այն չի ստորագրել նախագահ Արմեն Սարգսյանը և չի ուղարկվել ՍԴ՝ քննարկելու դրա սահմանադրական լինելը։