ԵՐԵՎԱՆ, 29 հունիսի – Sputnik. ՄԱԿ-ի զարգացման գործակալությունը հայ պատգամավորներին դրամաշնորհներ կտրամադրի նոր օրինագծեր մշակելու համար։ Միջոցները կհատկացվեն «Նոր Հայաստան՝ ժամանակակից խորհրդարան» նախագծի շրջանակում։
ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում հանձնաժողովի նախագահ Նաիրա Զոհրաբյանն ասաց, որ դրամաշնորհների հայտերի համար պետք է համապատասխան գաղափարներ ներկայացնել։
Դրամաշնորհների գումարը մինչև 12 հազար դոլար է։ Այդ միջոցներով պետք է նոր օրինագծերը հիմնավորող ուսումնասիրություններ անցկացնել։ Զոհրաբյանն առաջարկում է սելեկտիվ աբորտների մասին օրինագիծ ընդունել։
«Մենք սելեկտիվ աբորտների շատ բարձր ցուցանիշ ունենք։ Սելեկտիվ աբորտների արդյունքով Հայաստանը հայտնվել է բավականին տխուր իրավիճակում՝ Ալբանիայի և Ադրբեջանի հետ»,- նշեց Զոհրաբյանը։
«Իմ քայլը» խմբակցության պատգամավոր, Հայաստանի եզդիների համայնքը ներկայացնող Ռուստամ Բաքոյանն իր հերթին առաջարկեց ուսումնասիրել եզդիների շրջանում վաղ ամուսնությունների հետ կապված իրավիճակը։ Նրա խոսքով՝ պետք է բազմակողմանի ուսումնասիրություն անցկացնել, թե ինչու են եզդիներն ամուսնացնում իրենց դուստրերին մինչ դպրոցն ավարտելը։ Պատգամավորն ընդգծեց, որ այդ երևույթի դեմ պետք է պայքարել ու դա հիմնավորված անել։
Երբ ապագա երեխայի ճակատագիրը վճռում է տաքսիստը. սելեկտիվ աբորտները Հայաստանում պակասել են
Նշենք՝ վերջին տարիներին Հայաստանում 100 աղջկա դեպքում 115 տղա է ծնվում, մինչդեռ նորմալ հարաբերակցությունը 104-105 է։ Բժիշկներին արգելվում է մինչ հղիության 14-րդ շաբաթն ասել երեխայի սեռը (այդ ժամանակ աբորտներն արգելված են)։ Այնուամենայնիվ, ապօրինի աբորտներ իրականացվում են։
Ինչո՞ւ են Հայաստանում ծնողները հրաժարվում երեխաներից. սոցապ նախարարության մեկնաբանությունը